Dous irmáns de Oza Cesuras levarán 15 quilos de alimentos e material didáctico ao Chatarras Raid de Marrocos
Os irmáns Daniel e Miguel Varela, veciños de Oza Cesuras, partirán este xoves rumbo a Marrocos para participar no Chatarras Raid, unha aventura solidaria de nove días que combina o motor coa axuda a quen máis o precisa. No seu vehículo transportarán 15 quilos de alimentos e material didáctico que entregarán á súa chegada para a Asociación Douha, beneficiaria desta edición.
Os dous mozos levarán así desde Oza Cesuras produtos destinados a apoiar o labor desta entidade, nunha iniciativa que converte o percorrido por Marrocos nunha oportunidade para colaborar con proxectos solidarios. O Concello de Oza-Cesuras contribúe a esta participación achegando os alimentos e o material didáctico que viaxarán cos irmáns.
O Chatarras Raid reunirá nesta edición 250 coches e 500 participantes procedentes de España, Portugal e Italia, o que a converte nunha das citas solidarias do mundo do motor máis multitudinarias. Durante nove días, os participantes percorrerán Marrocos co compoñente solidario como parte central da experiencia.
Daniel e Miguel Varela levarán o nome de Oza Cesuras a esta convocatoria internacional e contribuirán coa súa participación a facer chegar alimentos e material educativo aos seus destinatarios.