Curtis rende homenaxe ao Tío Benito do Santo cunha rúa que levará o seu nome
Curtis renderá homenaxe este venres 19 de xuño a Benito Seoane Paredes, coñecido popularmente como o Tío Benito do Santo, unha figura moi ligada á historia local e considerada clave no desenvolvemento da vila grazas ás súas achegas altruístas á comunidade.
O acto celebrarase ás 18.00 horas e servirá para descubrir a placa da nova rúa Tío Benito do Santo, nome que substituirá á actual rúa Ambulatorio como mostra de recoñecemento ao seu legado. A iniciativa busca preservar a memoria dunha persoa que, segundo destacan entidades locais e familiares, contribuíu de forma decisiva ao crecemento de Curtis nos primeiros anos do século XX.
A figura de Benito Seoane está estreitamente vinculada á expansión da localidade nun momento no que Curtis medraba arredor da estación de ferrocarril e da actividade feiral. As súas doazóns de terreos permitiron a construción de infraestruturas e espazos fundamentais para a vida da veciñanza, entre eles a igrexa, a casa reitoral ou os centros educativos.
Ademais, diferentes testemuños locais relacionan tamén a súa figura coa orixe do antigo campo da feira, un dos espazos máis representativos da historia do municipio e un elemento esencial no desenvolvemento económico e social da zona.
A homenaxe conta co apoio da Asociación Feira de 1900 de Curtis, unha entidade que traballa na recuperación e divulgación da memoria histórica local. Desde a asociación destacan que a feira naceu precisamente para lembrar o esforzo, a xenerosidade e o traballo das persoas que contribuíron a construír o Curtis actual, valores que identifican plenamente coa figura do Tío Benito do Santo.
O acto pretende reunir á veciñanza e á familia do homenaxeado nun recoñecemento que vai máis aló dun cambio de nome nunha rúa. Trátase de poñer en valor a contribución dunha persoa que apostou polo ben común e cuxa pegada continúa presente, máis dun século despois, en moitos dos espazos que forman parte da vida diaria do municipio.