Curtis prepara actividades educativas e de sensibilización para o 25N
O Concello de Curtis desenvolverá un programa de actividades con motivo do 25 de novembro, Día Internacional da Eliminación da Violencia contra as Mulleres, que incluirá conferencias, obradoiros e a elaboración dun podcast. Baixo o lema "O Concello de Curtis avanza en igualdade", a iniciativa busca dar visibilidade ás violencias machistas, promover a concienciación social e ofrecer ferramentas para identificalas e facerlles fronte.
A educación será un dos eixes centrais da proposta. A Asociación Larume impartirá unha charla con formato gamificado sobre prevención das violencias machistas, dirixida a rapaces e rapazas de entre 8 e 18 anos do municipio. Pola súa banda, os nenos e nenas que participan nos servizos de conciliación tomarán parte en xogos e dinámicas para traballar cuestións como a igualdade, o respecto e a prevención desde as primeiras etapas da vida.
O alumnado do IES de Curtis tamén se implicará na campaña a través de "Fóra de control", un laboratorio interactivo centrado na violencia dixital. Esta actividade permitirá analizar e recoñecer diferentes comportamentos, como o control, o acoso, a chantaxe ou a difamación, ademais de aprender pautas para previr estas situacións.
A programación contará tamén coa participación do Centro Penitenciario de Teixeiro, desde onde persoas privadas de liberdade conducirán o podcast "Voces contra as violencias machistas". O espazo pretende favorecer a reflexión e contribuír á sensibilización arredor desta problemática.
No ámbito da formación especializada, o Centro de Información á Muller (CIM) de Curtis acollerá o martes 24 de novembro un obradoiro impartido por Médicos do Mundo. A sesión estará dirixida a profesionais do sector sociosanitario e abordará a detección e o tratamento das violencias de xénero en contextos de prostitución e trata.
Outra acción formativa desenvolverase o mércores 2 de decembro e estará destinada ao monitorado de tempo libre. O obxectivo será facilitar recursos para identificar e previr comportamentos discriminatorios e situacións de acoso, así como para promover contornas seguras e igualitarias nas actividades de lecer.
Xunto a estas propostas, o Concello reforzará a difusión de mensaxes de sensibilización e prevención mediante carteis e publicacións nas redes sociais. A intención é implicar a toda a veciñanza na construción dun municipio máis igualitario, libre de violencias e baseado no respecto entre as persoas.