Curtis prepara a XXVI Exaltación dos Cogomelos con gastronomía, divulgación micolóxica e música
Curtis celebrará os días 24 e 25 de outubro a XXVI Exaltación dos Cogomelos, unha programación coa que o municipio volverá poñer o foco na riqueza micolóxica do territorio e na súa relación coa gastronomía local. Teixeiro concentrará boa parte das propostas, aínda que a actividade gastronómica estenderase aos establecementos hostaleiros de todo o municipio.
Durante as dúas xornadas desenvolverase unha ruta gastronómica na que os locais de Curtis e Teixeiro prepararán elaboracións nas que os cogomelos serán os protagonistas. A praza de España de Teixeiro acollerá tamén unha exposición de cogomelos que poderá visitarse ao longo dos dous días.
A programación terá ademais un carácter divulgativo coa saída para a recollida de cogomelos organizada coa participación de persoas expertas en micoloxía da Asociación Pan de Raposo. A actividade terá lugar o sábado 24 de outubro e partirá ás 10.00 horas da praza de España de Teixeiro. Durante o percorrido, as persoas participantes poderán coñecer as especies presentes na contorna.
A xornada do sábado completarase coa XI Ruada de Teixeiro, que terá como escenario a mesma praza. A proposta incluirá sorteos e pinchos gratuítos e contará cun espazo habilitado para aquelas persoas que desexen pasar a noite. A partir das 19.00 horas comezarán os cantos de taberna, mentres que ás 21.30 horas dará comezo unha foliada aberta.
A XXVI Exaltación dos Cogomelos está organizada polo Concello de Curtis, a través da Área de Feiras, Mercados e Sanidade, e pola Asociación Cultural Faragulla, coa colaboración da Xunta de Galicia e da Deputación da Coruña.