Curtis ofrece en Teixeiro un taller de defensa persoal para mulleres con sesión teórico-práctica
O Concello de Curtis, a través do Centro de Información á Muller (CIM), organiza unha nova edición do taller de defensa persoal para mulleres no núcleo de Teixeiro. A proposta forma parte da programación vinculada ao 25N (Día Internacional contra a Violencia de Xénero) e desenvolverase o sábado 7 de febreiro de 2026, entre as 16.00 e as 20.00 horas, no salón de actos do edificio de usos múltiples de Teixeiro.
O curso combina contidos teóricos e prácticos nun formato conxunto para facer a formación máis dinámica. Na parte conceptual abordaranse cuestións psicolóxicas relacionadas coa vítima e co agresor, así como nocións do código penal. Tamén se traballará un bloque centrado no control de cinco claves do programa (respiración, observación, valoración, estratexia e técnica) e na prevención de situacións de risco co obxectivo de evitar, na medida do posible, calquera confrontación física.
A organización explica que, no caso de que a situación non sexa evitable, o taller achegará ferramentas e recursos básicos de autoprotección, incluíndo técnicas orientadas a reaccionar ante posibles agresións, suxeicións ou ameazas. A finalidade é que as participantes conten con máis coñecementos e confianza para mellorar a súa seguridade persoal.
As inscricións poden formalizarse nas oficinas municipais de Curtis e Teixeiro, chamando ao 981789003 ou escribindo ao correo cimconcellocurtis@gmail.com. A actividade conta coa colaboración institucional da Xunta de Galicia.