Curtis convoca un pleno urxente para presionar pola reactivación de Losán e salvar case 200 empregos
O Concello de Curtis convocou un pleno extraordinario e urxente para o día 5 ás 14.00 co foco posto na situación do Grupo Losán, que atravesa unha crise económica que está a ter impacto directo na produción das súas fábricas e na estabilidade do cadro de persoal.
Segundo expón o goberno local, a compañía arrastra nos últimos anos atrasos reiterados no pago das nóminas, impagos de pagas extraordinarias e incumprimentos de acordos colectivos, ademais de débedas con provedores e empresas auxiliares que traballan nos centros de Curtis, Vilasantar e A Coruña. O Concello advirte de que este escenario compromete a continuidade da actividade industrial e o futuro laboral de preto de 200 traballadores directos, ademais de emprego indirecto ligado ao transporte e á subministración de materias primas.
A convocatoria chega nun contexto de crecente tensión laboral. A finais de decembro, o persoal mobilizouse na Coruña para reclamar o cobro de salarios e da extra de Nadal, denunciando meses sen percibir as cantidades correspondentes.
O alcalde explicou que ao longo de 2025 o Concello mantivo contacto continuado co presidente do Consello de Administración do grupo, coa Dirección do IGAPE e coa Consellería de Economía e Industria da Xunta de Galicia, ofrecendo colaboración municipal para contribuír a unha solución. Nesa liña, o pleno debaterá unha proposta de acordo que inclúe o respaldo institucional ao persoal, a esixencia de reactivar de inmediato a actividade produtiva e a reclamación do pago íntegro das retribucións pendentes.
Ademais, o goberno local pretende instar formalmente ao IGAPE, á Consellería, á SEPI e ao Ministerio de Industria a coordinarse coa dirección da empresa para articular unha saída que garanta a continuidade do proxecto industrial. O Grupo Losán leva tempo inmerso nun proceso financeiro complexo, con referencias a unha débeda superior a 200 millóns de euros e a medidas de apoio público ligadas á súa reestruturación.
‘O Concello de Curtis non pode permitirse perder un motor económico e social desta magnitude’, subliñou o rexedor, que pediu ‘responsabilidade e celeridade’ a todas as partes. O acordo que se adopte será remitido ao Grupo Losán, ao IGAPE, á Xunta de Galicia, á SEPI e ao Ministerio de Industria.