Curtis aproba rebaixar á metade a taxa do lixo para as microempresas
O pleno do Concello de Curtis celebrado este xoves aprobou varias modificacións que afectan tanto á organización interna do persoal municipal coma á fiscalidade local, ademais de abordar asuntos relacionados coa delegación de competencias e a sanidade pública.
Un dos puntos centrais da sesión foi a modificación da relación de postos de traballo (RPT), un documento que define e ordena as funcións do persoal ao servizo do consistorio. Con este cambio, preténdese dotar de maior eficiencia á administración local e reforzar o marco xurídico baixo o que traballan os empregados municipais.
Os axustes afectan, en concreto, aos postos da unidade de obras e servizos, así como a prazas de carácter técnico e administrativo. Tamén se contempla unha mellora nas condicións laborais dos peóns do Grupo de Emerxencias Supramunicipal (GES), que a partir de agora pasarán a integrarse no Grupo IV. Así mesmo, créase unha nova praza de monitor deportivo-adestrador, coa que se pretende reforzar a atención nos dous ximnasios municipais, situados en Curtis e en Teixeiro. Por último, amplíase a xornada laboral do posto de asesoría xurídica do Centro de Información ás Mulleres (CIM).
O informe no que se sustenta esta modificación foi elaborado pola mesma empresa que redactou no seu momento a RPT orixinal, e nel detállanse os cambios nas funcións e valoracións dos postos afectados. A proposta foi presentada previamente ante a mesa de representantes do persoal e os sindicatos, onde obtivo o respaldo unánime. No pleno, a iniciativa saíu adiante co voto a favor do Partido Popular e a abstención do Bloque Nacionalista Galego (BNG).
Redución da taxa de residuos para microempresas
Outro dos asuntos tratados foi a rebaixa da taxa pola recollida e xestión de residuos para as microempresas do municipio. Segundo a ordenanza fiscal en vigor, os negocios con menos de 10 traballadores viñan aboando 392 euros anuais por este concepto. Tras a aprobación unánime da proposta, esa cantidade reducirase a 200 euros ao ano, o que supón unha baixada do 49 %.
O alcalde de Curtis, Javier Caínzos, sinalou que a vontade do goberno local sería reducir aínda máis esta tarifa, aínda que explicou que a normativa vixente non o permite, xa que se rexe polo principio de "quen contamina paga". Nas súas palabras: "Se a lei permitise que os concellos cofinanciasen o servizo, estudaríamolo, pero temos que aplicar a lei". E engadiu: "Se por nós fose, teriamos unha tarifa bastante máis baixa".
Delegación de sancións e debate sobre atención primaria
A corporación tamén deu luz verde a ampliar a delegación de competencias tributarias na Deputación da Coruña. A partir de agora, a institución provincial encargarase de tramitar e recadar os expedientes sancionadores derivados de infraccións de tráfico, así como as sancións por infraccións leves da lei antitabaco. En ambos os casos, a medida responde ao aumento dos boletíns de denuncia que a Garda Civil vén remitindo ao Concello, o que incrementou notablemente a carga de traballo do persoal municipal.
Por outra banda, debateuse unha moción presentada polo BNG para mellorar a atención primaria no municipio, na que o grupo nacionalista reclamaba diversas medidas para reforzar o persoal e as prestacións dos centros de saúde de Curtis e Teixeiro. Desde o grupo popular respondeuse que o Concello "leva tempo trasladando á Xunta as necesidades existentes nos nosos centros sanitarios" e lembraron que a propia Xunta xa aprobou un plan autonómico que contempla reforzar os equipos profesionais e mellorar as infraestruturas sanitarias.
Finalmente, o BNG presentou outras dúas mocións: unha de condena polo que cualificou de xenocidio contra o pobo palestino, e outra para incorporar dúas prazas de bedel nos colexios de Teixeiro e Curtis. A urxencia de ambas as iniciativas foi rexeitada, xa que, segundo o grupo municipal do PP, tratábase de propostas que xa fosen votadas e aprobadas en plenos anteriores, polo que non consideraban necesario repetir o debate.