Críticas á Xunta polo novo atraso na substitución da cuberta do CPI Castro Baxoi
O BNG de Miño acusa á Xunta de Galiza de 'volver darlle as costas' á comunidade educativa do CPI Castro Baxoi tras a comparecencia no Parlamento galego do secretario xeral técnico da Consellaría de Educación. A formación nacionalista critica que o Goberno galego non concrete unha solución inmediata para os problemas estruturais do centro e sitúe a posible substitución da cuberta no verán de 2027.
A deputada do BNG Mercedes Queixas lembrou que a propia Xunta xa recoñeceu no ano 2023 a existencia de filtracións e o mal estado da cuberta. Segundo sinalou, tres anos despois 'non só non se fixo nada', senón que agora se formula un novo adiamento dunha intervención que, ao seu xuízo, debería executarse con urxencia.
Desde o BNG consideran 'especialmente grave' que a Consellaría defenda que no CPI Castro Baxoi se actúa de forma 'constante e planificada'. A organización sostén que os datos de investimento amosan o contrario, ao indicar que entre 2015 e 2023 a Xunta destinou arredor de 180.000 euros ao centro e que entre 2023 e 2026 só se executaron uns 27.000 euros, vinculados ao acondicionamento de aulas polo desdobre realizado en 2024.
O portavoz municipal do BNG, Alberte G. Nicolás, censurou que o PP afirme que aposta polo ensino público 'con feitos e non con titulares', cando, segundo di, os feitos demostran que o centro leva anos deteriorándose sen unha resposta efectiva. Tamén criticou que a Xunta anuncie actuacións por máis de 400.000 euros sen ofrecer, segundo denuncia, un calendario claro nin un compromiso firme para resolver os problemas do edificio.
A formación nacionalista lembra ademais que esta mesma fin de semana Protección Civil de Miño tivo que acudir ás instalacións do CPI Castro Baxoi para balizar parte do recinto polo risco de desprendementos na fachada. Para o BNG, este episodio evidencia a situación das infraestruturas e contradí a versión trasladada polo Goberno galego.
Mercedes Queixas insistiu en que a Consellaría leva desde 2023 analizando os problemas de filtracións e que xa daquela se comprometeu a substituír a cuberta. A deputada cualificou de 'falta absoluta de respecto' á comunidade educativa de Miño que agora se fale de agardar un ou dous anos máis e concluíu que 'non se pode estar gobernando no público contra o público'.