Coirós programa catro actividades polo 25N para combater a violencia machista
Coirós conmemorará o Día Internacional da Eliminación da Violencia contra as Mulleres cunha programación especial que se desenvolverá entre o 17 e o 27 de novembro. O Centro de Información á Muller (CIM) municipal organiza catro actividades gratuítas co obxectivo de promover a igualdade, sensibilizar sobre as distintas formas de violencia contra as mulleres e fomentar a reflexión colectiva.
A primeira cita será o martes 17 de novembro cunha charla titulada 'Sementes de cambio: Erradicando a violencia sexual', que estará acompañada dun café. A proposta abrirá un programa que busca abordar a violencia machista desde diferentes perspectivas e ofrecer espazos de encontro e participación.
A seguinte actividade terá lugar o martes 24 de novembro. Nesa xornada desenvolverase unha formación sobre 'Fundamentos da dixitalización empresarial', dirixida ás mulleres.
Un manifesto e unha curtametraxe para pechar a programación
O propio Día Internacional da Eliminación da Violencia contra as Mulleres, o mércores 25 de novembro, celebrarase a lectura do Manifesto Institucional contra a violencia de xénero, nun acto co que o municipio reafirmará o seu compromiso coa erradicación desta lacra.
A programación continuará o venres 27 de novembro coa proxección da curtametraxe 'Postre', protagonizada por Luisa Merelas e dirixida por Roberto Alvite. A sesión rematará cun coloquio co director, que permitirá afondar na obra e compartir reflexións co público asistente.
Todas as actividades desenvolveranse no Centro Social de Coirós e serán de balde. As propostas están organizadas polo CIM de Coirós no marco da conmemoración do 25N, unha data que cada ano chama a atención sobre a necesidade de previr e combater todas as formas de violencia contra as mulleres.