Coirós abre unha nova bolsa de auxiliares para reforzar o Servizo de Axuda no Fogar
O Concello de Coirós activou unha nova convocatoria para ampliar a bolsa de emprego de auxiliares do Servizo de Axuda no Fogar (SAF), un recurso municipal clave para a atención a persoas maiores, dependentes ou con necesidades de apoio no seu domicilio.
A resolución establece un prazo de cinco días naturais para a presentación de solicitudes desde a súa publicación no taboleiro de anuncios da sede electrónica municipal. O obxectivo é reforzar o servizo coa contratación dunha auxiliar a xornada completa e outra a xornada parcial para cubrir a demanda actual coa maior brevidade posible.
A medida chega despois da aprobación, o pasado 1 de xuño, dunha bolsa de emprego integrada por cinco aspirantes. Ese mesmo día tamén se formalizou a contratación dunha auxiliar mediante contrato temporal, a xornada completa, por un período máximo de seis meses.
O proceso selectivo da nova convocatoria celebrarase o 23 de xuño de 2026 nas dependencias municipais. A comisión seleccionadora estará presidida por María Rosario Cal Dopico e contará como vogais con Paula María Medal Martínez, Begoña Riveira Barros e Raquel Montero González. A secretaría recaerá en Paula Boado Presas.
Con esta decisión, o Concello pretende actualizar e ampliar a bolsa dispoñible para garantir a continuidade dun servizo esencial no municipio.