Cambre abre o prazo para solicitar praza no Programa Mañanceiro do curso 2026-2027
O Concello de Cambre abrirá o próximo 7 de xullo o prazo de inscrición para participar no Programa Mañanceiro correspondente ao curso escolar 2026-2027. Trátase dun servizo municipal pensado para favorecer a conciliación da vida familiar e laboral, ofrecendo atención, vixilancia e, de forma opcional, almorzo ao alumnado antes do inicio da actividade lectiva.
As solicitudes poderán presentarse entre o 7 de xullo e o 7 de agosto de 2026. Aínda así, o Concello permitirá realizar novas inscricións ao longo do curso escolar. Nestes casos, se o grupo xa alcanzou o número máximo de participantes, as peticións incorporaranse á lista de agarda.
O programa estará dispoñible na Escola de Educación Infantil San Bartolomeu de Pravio e nos CEIP Gonzalo Torrente Ballester de Sigrás, Wenceslao Fernández Flórez, Emilio González López de Brexo-Lema, Portofaro e Plurilingüe Graxal.
Poderán participar os nenos e nenas empadroados en Cambre que estean matriculados nun centro de Educación Infantil ou de Educación Infantil e Primaria do municipio. No caso de quedar prazas libres, tamén se admitirán escolares non empadroados.
O servizo prestarase de luns a venres durante os días lectivos do calendario escolar oficial, desde as 7.30 horas ata o comezo das clases en cada centro educativo. A súa posta en marcha coincidirá co primeiro día oficial do curso 2026-2027, mentres que o alumnado de 3 anos poderá incorporarse unha vez rematado o seu período de adaptación e cando comece a asistencia en horario completo.
As familias poderán escoller entre diferentes modalidades, contratando o servizo para o mes completo ou por días soltos, cun máximo de 12 xornadas. Ademais, existirá a opción de incluír ou non o almorzo.
O Programa Mañanceiro contará con persoal cualificado encargado da atención ao alumnado, da organización de actividades de ocio e tempo libre e da preparación e servizo dos almorzos para aqueles participantes que o soliciten.
Inicialmente, cada centro educativo ofrecerá un máximo de 26 prazas, unha cifra que poderá modificarse en función da demanda, da dispoñibilidade de espazos e dos recursos económicos destinados ao programa.
As solicitudes deberán presentarse a través da sede electrónica da páxina web municipal ou en calquera dos Rexistros de Entrada do Concello de Cambre.
O 28 de agosto publicarase unha primeira información coas solicitudes recibidas. Unha vez revisada toda a documentación, o Concello fará pública, antes do inicio do curso escolar, a listaxe definitiva de persoas admitidas, excluídas e en lista de agarda. As vacantes que poidan xurdir ao longo do ano cubriranse seguindo a orde desa lista.
As familias que precisen máis información poden poñerse en contacto co departamento de Educación do Concello de Cambre no teléfono 981 61 32 91.