Búscase a fotografía que dará vida ao calendario municipal de Ordes de 2027
Cal é a imaxe que mellor representa o municipio? O Concello de Ordes acaba de poñer en marcha o concurso fotográfico 'Captura Ordes', unha iniciativa coa que busca implicar á cidadanía na elección da fotografía que protagonizará a portada do calendario municipal de 2027.
O certame está aberto a calquera persoa, independentemente de que resida ou non no municipio. O único requisito é que a fotografía presentada fora tomada dentro do territorio municipal. A participación é gratuíta e as persoas menores de idade deberán contar coa autorización dos seus proxenitores ou titores legais.
A temática é ampla e permite retratar calquera aspecto vinculado ao municipio, desde as súas paisaxes e patrimonio ata as tradicións, as persoas, os lugares singulares ou escenas da vida cotiá.
Cada participante poderá presentar unha única fotografía, que deberá ser orixinal e inédita. As bases prohiben expresamente o uso de imaxes xeradas mediante intelixencia artificial ou de fotomontaxes que alteren a realidade.
Prazo ata o 11 de outubro
As fotografías deberán enviarse por correo electrónico a cultura@ordes.gal antes do 11 de outubro. No asunto deberá indicarse 'Concurso Fotográfico Calendario 2027', seguido do nome e apelidos da persoa participante.
A mensaxe deberá incluír tamén o nome completo do autor ou autora, un teléfono de contacto, o título da obra e unha breve descrición ou localización da fotografía.
Unha vez rematado o prazo, o Concello comprobará que as propostas cumpren os requisitos establecidos e dará paso á votación popular.
A cidadanía elixirá a imaxe gañadora
A elección realizarase mediante unha votación popular en liña que estará activa entre o 19 de outubro e o 2 de novembro de 2026 a través dun formulario público.
A fotografía que reúna o maior número de votos válidos será a gañadora e converterase na imaxe de portada e principal ilustración do Calendario Oficial 2027.
A persoa autora recibirá ademais unha mención especial tanto no propio almanaque como nas canles de difusión municipais.
As bases completas, incluída a información sobre os dereitos de propiedade intelectual e de imaxe, están dispoñibles na páxina web oficial do Concello de Ordes.