As vivendas con placas solares en Arteixo poderán beneficiarse dunha rebaixa do 50% no IBI durante tres anos

As persoas propietarias de vivendas que instalen placas solares poderán beneficiarse dunha redución do 50% no recibo do Imposto sobre Bens Inmobles (IBI) durante tres anos. O Concello manterá esta bonificación nos orzamentos de 2027, de maneira que a rebaixa se aplicará durante os tres exercicios seguintes á finalización das obras, sempre que a instalación estea debidamente xustificada e se cumpran os requisitos establecidos.
Para acceder a esta bonificación, a persoa solicitante deberá estar empadroada no inmoble para o que pide a redución e atoparse ao corrente das súas obrigas tributarias co Concello de Arteixo no momento da concesión.
A documentación que se debe presentar inclúe a comunicación de obra menor ou a licenza correspondente, segundo o caso, así como un certificado detallado asinado por un técnico competente. Este documento debe acreditar que a instalación cumpre a normativa aplicable e que os sistemas e as medidas correctoras funcionan con plena eficacia e seguridade.
Tamén será necesario achegar o certificado enerxético do estado final da actuación, inscrito no Rexistro de Certificados de Eficiencia Enerxética de Edificios de Galicia, e xustificar a inscrición da instalación de autoconsumo no rexistro da Consellería de Industria.
A bonificación está condicionada, ademais, a que as instalacións destinadas á produción de calor inclúan colectores coa correspondente homologación da Administración competente. Segundo o Concello, estas condicións técnicas forman parte dos requisitos habituais para a instalación de placas solares nas vivendas.