As universidades galegas reclaman reforzar a revisión dos exames da PAU tras as incidencias deste ano
As tres universidades públicas galegas moveron ficha tras a polémica xerada polas incidencias detectadas na convocatoria ordinaria da PAU 2026. A reitora e os reitores emitiron un comunicado conxunto no que defenden o funcionamento da Comisión Interuniversitaria de Galicia (CiUG), mais tamén reclaman cambios para reforzar o proceso de elaboración e revisión dos exames.
O comunicado chega despois de varios días de críticas e declaracións públicas arredor dos erros rexistrados en dúas materias. As universidades recoñecen a preocupación xerada entre o estudantado e subliñan que as súas delegacións na CiUG foron as primeiras en facer autocrítica, analizar as incidencias e adoptar medidas para evitar consecuencias negativas para o alumnado.
As reitorías lembran que a CiUG funciona desde 1993 como órgano encargado da organización das probas de acceso á universidade en Galicia. Está integrada por representantes das tres universidades públicas e por membros designados pola Consellería de Educación, Ciencia, Universidades e Formación Profesional, cunha participación equilibrada entre o sistema universitario e a Xunta.
No texto, as universidades poñen en valor un modelo que, segundo destacan, permitiu que máis de 500.000 estudantes realizasen as probas desde a súa creación sen que se producise ningunha filtración. O sistema baséase na elaboración de varias propostas de exame por materia e na limitación do coñecemento deses contidos para garantir a confidencialidade ata o momento da proba.
Con todo, a reitora e os reitores consideran que a convocatoria deste ano demostrou a necesidade de actualizar a normativa galega que regula a PAU, vixente desde 2011. A súa proposta pasa por combinar a máxima seguridade na custodia dos exames cun procedemento máis sólido de revisión dos contidos.
As universidades aseguran que xa en xuño de 2024 trasladaron á Consellería unha proposta para modificar a orde autonómica, despois da aprobación do Real decreto estatal 534/2024. Entre as medidas formuladas figuraba incorporar unha segunda persoa na elaboración dos exames de cada materia, co obxectivo de minimizar posibles erros humanos. Segundo o comunicado, esa petición foi reiterada en distintas reunións sen recibir resposta.
O documento tamén reivindica o traballo dos máis de mil profesionais do ensino público galego e do persoal de administración que participan na organización da PAU. As universidades insisten en que a práctica totalidade dos grupos de traballo, comisións e equipos implicados desenvolveron o seu labor con rigor e profesionalidade.
A mensaxe final apunta xa á próxima convocatoria. As universidades galegas avalan unha nova proposta das súas delegacións na CiUG para remitila á Administración autonómica, coa intención de incorporar melloras canto antes e evitar que se repitan incidencias como as deste ano.