As Merendiñas reunirá ás persoas maiores de Vilalba nunha xornada de convivencia, música e tradición
As persoas maiores de 65 anos de Vilalba volverán ser as protagonistas dunha das citas máis tradicionais do calendario festivo local coa celebración da Romaría das Merendiñas, que terá lugar o vindeiro 6 de xuño nos xardíns das Torres de Santa Cruz.
A xornada arrancará ás 13.00 horas e reunirá centos de asistentes nun encontro pensado para fomentar a convivencia, o reencontro e o desfrute dunha celebración que se mantén viva grazas á participación da veciñanza e ao traballo de numerosos colaboradores.
Para acceder ao recinto será necesario presentar a invitación que o Concello está a facer chegar aos domicilios das persoas destinatarias desta iniciativa, reservada para maiores de 65 anos.
O menú volverá apostar polos sabores máis tradicionais, con empanada, roxóns, chourizo ao estilo Santaia, larpeira e queixo con marmelo, nunha comida que se converterá no eixo central da romaría.
A música terá tamén un papel destacado ao longo da xornada. Antes e despois do xantar haberá actuacións para animar o ambiente e favorecer o baile e a participación dos asistentes. O programa contará coa presenza da Banda de Música Municipal, do dúo Xilo e Carlos e das voces solistas de María José Pereira e Arturo.
Desde a organización destacan ademais a importancia da implicación das persoas voluntarias que colaboran cada ano na preparación e desenvolvemento desta celebración. O seu apoio resulta fundamental para garantir o éxito dunha romaría que, edición tras edición, se consolida como unha das actividades máis agardadas polas persoas maiores do municipio.