As inscricións no curso de socorrismo acuático de Miño rematan este venres
Este venres, 16 de febreiro, remata o prazo de inscrición para o curso de socorrismo en instalacións e espazos naturais, que o Concello e a Federación de Salvamento e Socorrismo de Galicia traen de regreso a Miño este ano tras 17 anos.
A formación impartírase os venres, sábados e domingos durante os meses de marzo e abril, ademais de ao longo das vacacións de Semana Santa. Pola súa banda, as probas de acceso están programadas para realizarse o venres 23 de febreiro.
Os horarios de celebración das sesións serán de 17.00 a 21.00 horas os venres; de 10.00 a 14.00 e de 16.00 a 20.00 horas os sábados, así como o luns, martes e mércores de Semana Santa; e de 10.00 a 14.00 horas os domingos.
Entre os requisitos para poder participar atópanse ter 18 anos cumpridos, estar en posesión do título da ESO, saber nadar e superar a proba de acceso. Doutra banda a tarifa xeral será de 500 euros, menos para as persoas empadroadas no Concello de Miño, que deberán abonar un importe de 300 euros.
No caso de precisar máis información pódese obtela a través da axente de Emprego e Desenvolvemento Local nos números 981 782 659 e 981 784 405 ou na dirección de correo electrónico promocioneconomica.emprego@concellodemino.gal, ou ben chamando á Federación de Salvamento e Socorrismo de Galicia a través do 981 977 120 ou en fessga@gmail.com.