As familias de Coirós xa poden solicitar as axudas para material escolar e transporte do curso 2026/2027
As familias de Coirós xa poden solicitar as axudas municipais destinadas a facilitar os gastos educativos do curso 2026/2027. A convocatoria inclúe dúas liñas de apoio, unha para a adquisición de libros e material escolar e outra para sufragar parte dos custos de transporte do alumnado que ten que estudar fóra do municipio.
No caso das axudas para libros e material escolar, están dirixidas ao alumnado do segundo ciclo de Educación Infantil. A contía poderá chegar aos 150 euros por estudante, cunha partida municipal de 6.000 euros para esta convocatoria.
A segunda liña está destinada ao transporte escolar de persoas empadroadas en Coirós que cursen estudos fóra do municipio. Poderán acceder a estas axudas estudantes de Bacharelato, Formación Profesional, Universidade, Escola Oficial de Idiomas e tamén persoas que cursen estudos baixo réxime de discapacidade.
Neste caso, as achegas poderán alcanzar os 900 euros, dependendo do destino do desprazamento, e o Concello conta cun orzamento de 5.500 euros para esta liña.
Prazo aberto ata o 20 de outubro
O prazo para presentar as solicitudes estará aberto ata o 20 de outubro de 2026. As familias interesadas poden realizar o trámite no Rexistro Xeral do Concello, a través da sede electrónica municipal ou mediante os restantes medios previstos na normativa administrativa.
Para determinar os requisitos económicos da convocatoria tomarase como referencia a renda familiar correspondente ao exercicio fiscal de 2025.
As bases completas e os formularios necesarios para solicitar as axudas están dispoñibles na web municipal. Con esta convocatoria, o Concello busca ofrecer apoio ás familias do municipio para afrontar parte dos gastos asociados á educación e facilitar tamén os desprazamentos do alumnado que debe continuar os seus estudos fóra de Coirós.