Arteixo organiza un taller para aprender a construír hoteis para insectos polinizadores
O Espazo Municipal Ecolóxico (EME) de Arteixo abrirá o vindeiro 1 de agosto un novo curso dedicado á conservación da biodiversidade, centrado na construción de hoteis para insectos polinizadores. A actividade desenvolverase no Parque Municipal de Monticaño, na Pastoriza, entre as 10.00 e as 14.00 horas.
O taller, impartido por Javier Cotelo Rama, responsable do EME, está dirixido a persoas afeccionadas á horta e ao xardín con nivel de iniciación e ten como obxectivo dar a coñecer a importancia dos insectos polinizadores no equilibrio dos ecosistemas e promover a súa protección mediante a elaboración dun refuxio para estas especies.
Durante a sesión abordaranse cuestións como a identificación dos principais insectos polinizadores e da súa función na natureza, a relevancia da polinización para as plantas, a biodiversidade e a alimentación, as necesidades de refuxio destes insectos beneficiosos e a construción dun hotel para polinizadores con materiais naturais, así como recomendacións para a súa correcta instalación.
O prezo da actividade é de 15 euros, incluíndo inscrición e material, para persoas empadroadas en Arteixo, clientes de Sumarte e colectivos asimilados, mentres que para o público xeral será de 25 euros. O curso conta con 15 prazas, que se asignarán por orde de inscrición.