Arteixo ensina a preparar un botiquín natural con plantas silvestres en Monticaño
Arteixo acollerá o sábado 4 de xullo a segunda edición do taller 'Botiquín natural con plantas silvestres', unha actividade pensada para persoas afeccionadas á ecoartesanía e para todas aquelas que queiran iniciarse no uso responsable das plantas medicinais.
A proposta desenvolverase no Parque Municipal de Monticaño, en Pastoriza, entre as 10.00 e as 14.00 horas. O curso estará impartido por Nines Domínguez e Lidia Ares e permitirá coñecer cinco plantas medicinais silvestres coas que elaborar un botiquín natural básico para o coidado do corpo e da mente.
Durante a xornada, as persoas participantes recibirán unha introdución práctica ás plantas medicinais, ás normas básicas de recollida responsable e ás técnicas para identificar, conservar e preparar correctamente as especies seleccionadas. O programa inclúe tamén unha saída de recoñecemento e recollida, ademais de explicacións sobre o seu cultivo, colleita, propiedades, usos e precaucións.
A parte práctica do obradoiro centrarase na elaboración de tres preparados medicinais: un aceite macerado, unha pomada e un colutorio dental herbal. Ao remate do curso, cada participante levará os seus preparados.
A actividade conta con 15 prazas, que se cubrirán por orde de inscrición. Terán prioridade as persoas empadroadas en Arteixo e os clientes de Sumarte, o Servizo Municipal de Augas e BiciArteixo. O prezo será de 25 euros para empadroados, clientes de Sumarte e asimilados, e de 35 euros para o público xeral.
As solicitudes que queden sen praza serán convocadas para unha próxima edición do curso.