Arteixo ensina a facer marmeladas e conservas naturais nun taller práctico en Monticaño
Aproveitar os produtos de tempada, reducir o desperdicio alimentario e recuperar técnicas tradicionais de conservación. Ese é o obxectivo do taller de marmeladas e conservas naturais que se celebrará este sábado 12 de setembro no Parque Municipal de Monticaño, na Pastoriza.
A actividade está pensada para persoas afeccionadas á ecoartesanía e non require experiencia previa, xa que se trata dun curso de nivel iniciación. A formación correrá a cargo de Pilar Sotelino, coñecida nas redes sociais como @avoamakika.
O taller desenvolverase entre as 10.00 e as 14.00 horas e terá un marcado carácter práctico. Ao longo da xornada, os participantes aprenderán a seleccionar e preparar froitas e hortalizas de tempada, así como diferentes técnicas para elaborar marmeladas e conservas naturais.
Desde a preparación dos alimentos ata o envasado
O programa abordará cuestións fundamentais para conseguir unha elaboración segura, desde a limpeza e preparación dos ingredientes ata as proporcións necesarias durante a cocción.
Tamén se explicarán os métodos de conservación, a correcta esterilización dos envases, o peche ao baleiro e as principais recomendacións de hixiene alimentaria para poder repetir o proceso posteriormente na casa con seguridade.
A parte práctica permitirá elaborar unha receita durante o propio taller e resolver as dúbidas que vaian xurdindo. Ademais, a actividade rematará cunha degustación e cada participante poderá levar para a casa a marmelada e a conserva elaboradas durante a xornada.
Só hai 15 prazas
O taller conta con 15 prazas, que se asignarán por orde de inscrición, aínda que terán prioridade as persoas empadroadas en Arteixo e os clientes de SUMARTE, o Servizo Municipal de Augas e BiciArteixo, así como colectivos asimilados.
O prezo é de 15 euros para as persoas que cumpran os requisitos de bonificación e de 25 euros para a inscrición xeral. As persoas interesadas deberán realizar a inscrición previamente. No caso de quedar solicitudes sen praza, estas pasarán a formar parte da próxima edición do curso.