Arteixo aprobará no próximo pleno o regulamento de uso da Casa de Baños, que abrirá a finais de ano
O Concello de Arteixo levará ao vindeiro pleno a aprobación do regulamento de utilización da Casa de Baños, un documento que establecerá as normas de funcionamento da nova instalación termal, cuxa apertura está prevista para finais deste ano.
A futura Casa de Baños ofrecerá un percorrido termal de aproximadamente unha hora de duración, adaptado ás dimensións do edificio e cun aforo reducido. O acceso terá un prezo de 10 euros coa entrada individual, mentres que o bono de dez sesións permitirá reducir o custo ata os 8,5 euros por visita.
Na actualidade, unha empresa especializada está a realizar as probas de posta en marcha e verificación dos distintos sistemas da instalación. A rehabilitación reorganizou a distribución interior do edificio para adaptalo a un percorrido termal moderno e incorporou como principal novidade a cubrición do antigo patio interior, de 105,80 metros cadrados, mediante unha estrutura lixeira de aceiro e vidro que albergará unha piscina termal cuberta.
Este novo espazo, situado no que anteriormente era o patio de servizo, convértese no elemento central da Casa de Baños, integrándose no edificio sen alterar a súa configuración histórica e seguindo criterios de intervención respectuosos co patrimonio.
Tras a rehabilitación, a instalación distribúese en catro ámbitos correspondentes ás tres ás do inmoble, con planta en forma de "U", e ao patio central cuberto. O complexo contará con vestiarios adaptados, espazos de atención ao público e consulta médica, zonas húmidas de tratamento con piscina, saunas, duchas de contraste, pediluvio, inhalacións e áreas de descanso. O Concello sinala que esta configuración permitirá recuperar o uso histórico do edificio como espazo dedicado á saúde e ao benestar, mantendo ao mesmo tempo o seu valor patrimonial.
A actuación pretende conectar a tradición balnearia da Casa de Baños, un edificio con orixes documentadas no ano 1760, cun modelo de uso adaptado ás necesidades actuais. O antigo balneario de Arteixo é considerado un dos referentes históricos do termalismo galego, tanto polo seu uso terapéutico como polo seu papel na vida social e cultural do municipio ao longo dos séculos XVIII, XIX e boa parte do XX.
O proxecto foi impulsado polo Concello de Arteixo en colaboración coa Xunta de Galicia, a través de Turismo de Galicia, no marco do Plan de Recuperación, Transformación e Resiliencia financiado pola Unión Europea mediante os fondos Next Generation EU. A intervención supuxo un investimento próximo aos tres millóns de euros e permitiu a rehabilitación integral da Casa de Baños co obxectivo de recuperar este espazo histórico e convertelo nunhas termas públicas accesibles, sostibles e adaptadas ás actuais necesidades de saúde, benestar e uso cidadán.