Deportes | Concello | Educación

O prazo para apuntarse permanecerá aberto ata o 6 de xullo e a programación inclúe propostas deportivas, formativas e de lecer para a mocidade durante os meses de xullo e agosto

A Concellería de Xuventude do Concello de Arteixo abriu este luns o prazo de inscrición para o seu programa de actividades de verán, unha iniciativa que combina deporte, natureza, formación e ocio con propostas dirixidas á mocidade do municipio durante os meses de xullo e agosto.

As inscricións poderán realizarse entre o 30 de xuño e o 6 de xullo, ata as 14.00 horas, mediante o formulario habilitado polo Concello. As prazas son limitadas e asignaranse por orde de inscrición. A listaxe de persoas admitidas publicarase o 7 de xullo, mentres que o pagamento das actividades deberá efectuarse entre os días 8 e 9 de xullo.

A programación arrincará o 10 de xullo cunha xornada de paintball, que contará con 30 prazas e un custo de 5 euros. Os días 13, 14 e 15 de xullo celebrarase a primeira edición de 'Arteixo no Mar', unha actividade que permitirá practicar vela, kaiak e paddle surf por 12 euros.

O calendario continuará o 16 de xullo cunha xornada de rafting, tamén con 30 prazas e un prezo de 5 euros, mentres que o 17 de xullo está previsto un paseo a cabalo, limitado a dez participantes e cun custo de 5 euros.

Entre os días 19 e 22 de xullo desenvolverase un obradoiro de intelixencia artificial no que os participantes aprenderán a utilizar esta tecnoloxía para mellorar a súa produtividade. A actividade terá un custo de 6 euros.

Xa en agosto, 'Arteixo no Mar' regresará os días 17, 18 e 19 cunha nova quenda das actividades náuticas. O programa rematará os días 25 e 26 de agosto cunha viaxe ao parque Pena Aventura, en Portugal. A excursión inclúe transporte, seguro de responsabilidade civil, aloxamento en bungalós en réxime de pensión completa e acceso ás actividades do parque. Nesta proposta ofertaranse 50 prazas e o prezo será de 50 euros.

O Concello anima á mocidade interesada a formalizar a inscrición canto antes debido ao número limitado de prazas dispoñibles en cada unha das actividades.