Alternativa dos Veciños impulsa unha consulta para coñecer as necesidades da mocidade de Cambre
Alternativa dos Veciños promove en Cambre unha consulta pública para coñecer de primeira man as demandas e necesidades da mocidade de ata 30 anos. A iniciativa parte dunha proposta presentada pola formación na Xunta de Goberno, a partir da cal se puxo en marcha a enquisa.
Desde Alternativa sinalan que levan reclamando desde marzo a necesidade de realizar un diagnóstico real da situación da mocidade como paso previo para establecer prioridades e reactivar os servizos municipais de xuventude, que consideran deteriorados nos últimos anos.
Unha campaña para chegar á mocidade
Alternativa dos Veciños tamén reclama que a consulta vaia acompañada dunha campaña de difusión ampla para facilitar a participación. Entre as medidas que propón están trasladar a información aos centros educativos, asociacións xuvenís e clubs deportivos, así como colocar códigos QR en diferentes espazos de uso habitual da mocidade.
A formación tamén considera conveniente instalar mesas informativas nos centros escolares para achegar a enquisa directamente aos potenciais participantes.
Segundo explica Alternativa, o obxectivo é que esta consulta sirva como primeiro paso para coñecer as necesidades actuais da mocidade e avanzar na recuperación e actualización dos programas municipais de xuventude.
A formación asegura que durante o mandato de Unión por Cambre desapareceron máis de dez programas xuvenís e defende que algúns deles poidan recuperarse e adaptarse ás necesidades actuais dos mozos e mozas.