Alarma sindical ante un novo paso no desmantelamento do histórico hospital Santa Teresa na Coruña
A federación de saúde do sindicato CIG denunciou publicamente que o Grupo Quirón prosegue co que define como un desmantelamento progresivo e constante do histórico Instituto Policlínico Santa Teresa. Segundo explicou a organización de traballadores, a última medida nesta estratexia de fragmentación é a privatización do departamento de rehabilitación e fisioterapia, unha decisión que se fará efectiva a partir deste mércores 15 de xullo.
A xestión desta área de tratamento pasará a mans da firma privada Lusitania Salud, unha resolución que afecta de xeito directo a once profesionais do centro hospitalario herculino. De acordo coas queixas remitidas pola representación sindical, o persoal afectado atópase nun escenario de absoluta incerteza organizativa a moi poucas horas de que se consume a subrogación. Dende a CIG critican que as empregadas aínda non dispoñen de información elemental para o seu día a día, como o acceso aos novos programas informáticos, o método de rexistro da xornada laboral ou os protocolos de coordinación interna co resto de especialistas médicos.
A postura de Lusitania Salud (según o sindicato) limitouse por agora a trasladar un compromiso verbal de que respectará os dereitos laborais do equipo. Porén, dende a CIG lembran que o mantemento destas condicións constitúe un imperativo legal nos procesos de subrogación de cadros de persoal, polo que o sindicato esixe garantías formais e por escrito que certifiquen que non haberá perdas laborais.
A central sindical insiste en que este movemento non constitúe un caso illado, senón que forma parte dunha folla de ruta ben definida por Quirón. Nas súas denuncias lembran que o grupo empresarial xa privatizou de forma progresiva servizos como a limpeza, a informática e o mantemento, ademais de suprimir o servizo de urxencias propio para derivalo a profesionais dunha firma allea. Esta política de dispersión organizativa, segundo advirte a CIG, debilita as relacións entre departamentos e prexudica directamente a calidade asistencial que reciben os usuarios do histórico centro da Coruña.