Aberto o prazo para comunicar as cacharelas de San Xoán en Culleredo
A veciñanza de Culleredo que queira organizar unha lumarada, unha sardiñada ou unha barbacoa con motivo da noite de San Xoán deberá comunicalo previamente ao Concello. O prazo para realizar este trámite permanecerá aberto ata o vindeiro 20 de xuño, segundo recolle o bando publicado polo alcalde, José Ramón Rioboo, para regular o desenvolvemento destas celebracións tradicionais.
As comunicacións poderán presentarse por escrito no Concello ou enviarse a través do correo electrónico sanxoan@culleredo.es. As persoas interesadas deberán indicar os datos da persoa responsable, incluíndo DNI, enderezo e teléfono de contacto, así como a localización exacta da parcela ou do solar onde se vai realizar a celebración. Para iso, poderase achegar un plano ou a referencia catastral do espazo.
O horario autorizado para as lumaradas irá desde as 18.00 horas do día 23 de xuño ata as 3.30 horas do día 24. Durante ese período será obrigatorio cumprir unha serie de medidas de seguridade co obxectivo de evitar riscos tanto para as persoas participantes como para a contorna.
Entre as normas establecidas, queda prohibido prender cacharelas en zonas verdes e parques infantís, así como nun perímetro de 15 metros arredor destes espazos. Tampouco se poderán acender xunto a colectores, vehículos ou vivendas sen respectar esa distancia mínima de seguridade. Ademais, non estará permitido empregar combustibles con acelerantes e será necesario protexer o chan con area ou materiais similares.
No caso das sardiñadas e barbacoas, non poderán ocupar a calzada nin dificultar a circulación de vehículos. Tamén deberán contar con illamento térmico e cun extintor ou sistema semellante de seguridade. Unha vez rematada a celebración, as persoas responsables estarán obrigadas a deixar o espazo nas mesmas condicións nas que se atopaba inicialmente.
A Policía Local e Protección Civil encargaranse de vixiar o cumprimento destas normas durante a noite de San Xoán. Ademais, poderán retirar de maneira inmediata aqueles materiais ou instalacións que supoñan un risco para a seguridade, así como inspeccionar as cacharelas e fixar, se fose necesario, a altura máxima que deberán respectar.