Aberto o prazo para anotarse no Campamento Urbano de Verán 2026
O Concello de Cambre abriu o prazo de inscrición para o Campamento Urbano de Verán 2026, unha proposta pensada para facilitar a conciliación das familias durante as vacacións escolares e ofrecer unha alternativa de lecer ao alumnado máis novo do municipio.
A actividade está dirixida a nenos e nenas de educación infantil, primaria e 1º da ESO, e levarase a cabo durante os meses de xullo e agosto por quendas no CEIP Wenceslao Fernández Flórez.
O período para presentar as solicitudes permanecerá aberto do 14 ao 30 de abril de 2026, ambos incluídos. As persoas interesadas deberán formalizar a inscrición a través da sede electrónica do Concello de Cambre ou ben nos rexistros municipais, dentro do prazo establecido.
Desde o departamento organizador lembran que a documentación necesaria para completar o trámite xa está dispoñible. Entre os impresos que se poden descargar figuran a solicitude de inscrición, a información xeral do campamento e a autorización para a consulta dos datos de renda.
Para resolver dúbidas ou solicitar máis información, o Concello pon á disposición das familias o Departamento de Educación, no teléfono 981 613 291 e no correo electrónico educacion@cambre.org.