Abegondo da luz verde a un investimento de máis de 1,9 millóns para mellorar o saneamento de Orto, Crendes e Limiñón
O Concello de Abegondo aprobou este martes en pleno extraordinario, por unanimidade, o convenio de colaboración coa Xunta de Galicia para ampliar o servizo de saneamento nos núcleos de Orto e Crendes. A actuación supón un investimento de 1.529.288,74 euros e permitirá dotar dun servizo básico a máis veciños e mellorar a protección ambiental nunha contorna próxima ao encoro.
Segundo o acordo aprobado pola Corporación, Augas de Galicia asumirá o 80% do custo, cunha achega de 1.223.430,99 euros. Desta cantidade, o 60% procederá do Fondo Europeo Agrícola de Desenvolvemento Rural (FEADER). O Concello de Abegondo achegará os 305.857,75 euros restantes, que se distribuirán entre as anualidades de 2027 e 2028.
O alcalde, José Antonio Santiso, destacou o interese público da actuación, tanto pola mellora dunha infraestrutura necesaria para a veciñanza como pola súa contribución á protección do medio ambiente.
O rexedor tamén puxo o foco nas dificultades que implica levar o saneamento ás zonas rurais debido á dispersión da poboación. Segundo explicou, estas obras requiren percorrer grandes distancias para atender a un número reducido de habitantes, o que incrementa considerablemente o custo das infraestruturas.
Máis de 2,7 quilómetros de novas canalizacións
O proxecto contempla a instalación da rede de saneamento nos núcleos de Agrolongo, Tras da Igrexa, O Castro e O Carril.
En total, executaranse 13 tramos de colectores cunha lonxitude de 2.417 metros, aos que se sumarán 79 pozos de rexistro, unha condución de impulsión de 365 metros e un pozo de bombeo. Este sistema permitirá conducir as augas residuais recollidas ata a planta de tratamento.
Unha vez rematadas as obras e recibidas correctamente, o Concello de Abegondo pasará a ser o titular das instalacións e asumirá a súa posta en servizo, explotación, conservación e mantemento durante un período mínimo de cinco anos.
A actuación dá continuidade aos traballos realizados nos últimos anos na península de Orto e Crendes. Segundo os datos facilitados polo Concello, as distintas fases executadas nesta zona xa supuxeron un investimento superior aos 1,5 millóns de euros.
O obxectivo é continuar ampliando a cobertura dun servizo esencial nunha zona que, segundo as previsións manexadas polo Concello, podería alcanzar os 1.500 habitantes no ano 2042.
Outros 409.924 euros para o saneamento de Limiñón
O pleno tamén aprobou por unanimidade destinar 409.924,55 euros do POS Adicional da Deputación da Coruña á dotación de servizos de saneamento no núcleo de A Fraga, en Limiñón.
Neste caso, o Concello estudou diferentes alternativas tendo en conta as directrices do saneamento de Galicia para zonas con baixa densidade de poboación. A solución considerada máis favorable pasa pola creación dun sistema colectivo descentralizado.
A actuación incluirá a instalación dos colectores e a construción dunha pequena estación depuradora de augas residuais (EDAR), que permitirá tratar de maneira específica as augas xeradas neste núcleo.
Con estas dúas actuacións, o Concello busca seguir avanzando na extensión da rede de saneamento tanto en Orto e Crendes como en Limiñón, especialmente en zonas rurais onde a dispersión da poboación dificulta a implantación destas infraestruturas.