A voz dos alcaldes: 'O meu único obxectivo é deixar Abegondo mellor do que o atopei'
O alcalde de Abegondo repasa a súa traxectoria política, os cambios experimentados polo municipio desde 1995 e os proxectos que marcarán o seu futuro, coa vivenda, as infraestruturas deportivas e os servizos públicos entre as principais prioridades.
Como se iniciou na política e como se vinculou ao seu partido?
A verdade é que foi un pouco por casualidade. A idea que me propuxeron, alá polos anos noventa, era impulsar unha asociación cultural que finalmente acabou dando lugar a unha candidatura independente. Sorteouse quen debía ocupar o primeiro posto da lista e tocoume a min.
Como deu o salto e recibiu o impulso para ser alcalde?
Como dicía, non foi algo planificado. De mozo non tiña un interese especial pola política. Cando se deu aquela situación, a miña avoa ensinoume unhas escrituras do meu bisavó, que tamén fora alcalde, e aquilo chegoume ao corazón. Pediume que sempre fose honrado e, co paso dos anos, podo dicir que lle fixen caso. Sigo coa mesma idea coa que empecei.
A nivel persoal, que sacrificios supón formar parte do Goberno?
Ser alcalde do meu pobo é unha honra, pero require unha dedicación integral, porque a cidadanía recorre a ti para múltiples cuestións e necesidades do seu día a día. É un cargo que, se te desvives por el, como considero que se debe facer, implica numerosos sacrificios persoais. Débolle moito á miña familia, que aceptou a miña ausencia durante moitas horas fóra da casa. Tamén debo dicir que, co paso dos anos, un aprende a organizarse mellor para conciliar como merece.
E beneficios?
É moi gratificante poder contribuír ao avance do teu pobo. Vexo agora servizos e infraestruturas que non existían cando entrei e que hoxe son esenciais. Iso produce unha satisfacción difícil de acadar noutro ámbito da vida. Ademais, recibir o apoio constante dos veciños, o seu agarimo e o seu recoñecemento é moi agradecido.
Como equilibra a vida pública e a privada?
Eu son alcalde as 24 horas do día e os 365 días do ano. É a miña responsabilidade cos meus veciños e veciñas, e aprendín a vivir combinando as dúas esferas. É a única fórmula para desempeñar o cargo como se espera de min.
Cales son os seus obxectivos a nivel político?
O meu único obxectivo na política é deixar Abegondo mellor do que o atopei, con condicións óptimas para vivir con benestar e cun plan de futuro. Non teño outra aspiración política que seguir traballando polo meu pobo e darlle ao concello un nome e unha consideración que antes non tiña.
E se renova na Alcaldía, cales son as principais actuacións previstas?
Estamos a rematar a ampliación do polideportivo municipal e a conversión dos Loureiros, un espazo que antes era privado e se destinaba a celebracións de vodas, no Pazo da Cultura. As dúas infraestruturas abriranse nas vindeiras semanas e a intención é poñer en marcha novos programas para aproveitalas ao máximo.
Serán un antes e un despois a nivel deportivo e social para Abegondo, do mesmo xeito que o foi o centro de saúde. Unha vez culminados estes tres grandes proxectos do mandato, o seguinte paso será promover vivenda para a mocidade e para as persoas maiores. Xa demos pasos coa adquisición de terreos e considero que son dous colectivos polos que nos debemos preocupar.
Cales son as principais liñas do seu programa?
O principal traballo que estamos a desenvolver nos últimos anos céntrase en incrementar os servizos de benestar para a veciñanza. Quero que Abegondo sexa un lugar tranquilo para residir, en consonancia coa biosfera, cun modelo de vivenda familiar, sen grandes urbanizacións e con todos os servizos, aproveitando a proximidade coa cidade. A sanidade, o deporte, a cultura, os servizos sociais e a educación concentran as principais actuacións.
De que proxectos se sente máis orgulloso?
O Abegondo actual pouco se parece ao de 1995. A modernización foi total, desde prestacións básicas como o abastecemento de auga ou a iluminación ata outras máis específicas, como as infraestruturas deportivas e recreativas. A rede de centros sociais, os campos de fútbol, o parque de Beche, os proxectos europeos para mellorar a calidade da auga, o programa de envellecemento activo ou o servizo de conciliación son só algúns exemplos.
Neste mandato, estou moi contento coa apertura do centro de saúde. Era a principal necesidade e pelexei todo o que puiden para que a Xunta construíse un recinto pioneiro á altura de Abegondo.
Que lle gustaría que os veciños visen en vostede como alcalde?
Como un bo home que loitou a morte polo seu pobo, con erros, pero sempre actuando con honestidade.
Como é a súa relación coa oposición?
Moi boa. Aquí coñecémonos todos e non ocorre o que se ve no Congreso ou nalgúns concellos máis grandes. Podemos discrepar en determinadas cuestións, pero tratamos de entendernos polo ben xeral.
EN CLAVE PERSOAL
- Idade, estado civil e familiar
66 anos, casado e pai de dous fillos. - Profesión e formación
Funcionario e profesor de Matemáticas. - E se non foras Profesor, que che gustaría ser?
Seguiría escollendo ser Alcalde de Abegondo. - Que querías ser de maior?
Piloto de avión. - Que fas para desconectar?
Estar na 'caixa da nada'. - Unha virtude e un defecto
A Honradez e ser demasiado Esixente. - Un consello para compartir
Fai o ben e non mires a quen. - Un libro
'A metamorfose', de Franz Kafka. - Unha película
'Mellor... imposible'. - Un grupo de música/cantante
Dire Straits e Robe. - Unha afección
Viaxar. - Un lugar que visitar
Despois de Abegondo, as cataratas do Iguazú. - Unha comida e unha bebida
Tortilla de patacas e cervexa. - Unha personaxe admirada
Jean-Jacques Rousseau. - Unha posesión preciada
Ter independencia e liberdade. - Un desexo
A desaparición das ideoloxías exacerbadas. - Algo para esquecer
A fame e a desigualdade. - Que é o que máis valora nunha persoa?
Honradez, honestidade e lealdade. - Un desafío pendente
Volver subir o Peñón de Ifach, en Calpe. - Onde te ves en cinco anos?
En Abegondo.