A Universidade da Coruña nomea doutores honoris causa a Marisol Soengas e Emery Brown
A Universidade da Coruña (UDC) investiu este mércores como doutores honoris causa á investigadora galega Marisol Soengas e ao anestesiólogo e profesor do Instituto Tecnolóxico de Massachusetts (MIT) Emery Brown, nun acto académico celebrado no Paraninfo da Reitoría e presidido polo reitor, Ricardo Cao.
Durante a cerimonia, Cao destacou que ambos científicos contribuíron a transformar o coñecemento en ámbitos fundamentais. No caso de Brown, salientou os seus avances na comprensión da consciencia e do funcionamento do cerebro baixo anestesia, mentres que de Soengas puxo en valor o seu labor na investigación do cancro e dos mecanismos que interveñen no desenvolvemento da enfermidade.
O primeiro en recibir a distinción foi Emery Brown, quen ofreceu a conferencia Descifrando a dinámica do cerebro inconsciente baixo anestesia xeral. O investigador explicou que a anestesia xeral non é equivalente ao sono nin implica que o cerebro permaneza inactivo, e expuxo como a análise da actividade cerebral mediante electroencefalogramas permite coñecer con maior precisión os efectos dos distintos anestésicos. Segundo indicou, estes estudos poden contribuír a mellorar o axuste das doses, reducir os tempos de recuperación e minimizar posibles efectos cognitivos posteriores, especialmente en pacientes vulnerables.
Na súa intervención tamén destacou o valor da anestesia como ferramenta para investigar o funcionamento do cerebro e avanzar no coñecemento de procesos como o desenvolvemento e o envellecemento cerebral, as enfermidades neurodexenerativas, as adiccións ou o coma.
A continuación foi investida Marisol Soengas, referente internacional na investigación do melanoma, que pronunciou a conferencia Baixar á acción no cancro: desde a investigación ata a empresa e a sala de tratamento. A científica repasou a súa traxectoria profesional tomando como fío condutor a "afouteza", unha actitude que, segundo explicou, marcou as principais decisións da súa carreira investigadora.
Soengas repasou o seu traballo desde a investigación básica ata a aplicación clínica e empresarial, así como o seu labor en entidades científicas e iniciativas de divulgación. Tamén reivindicou a necesidade de mellorar o acceso dos pacientes á información e aos novos tratamentos, advertindo de que moitos avances científicos aínda non chegan á práctica clínica debido ao seu custo e á falta de infraestruturas.
A investigadora concluíu facendo un chamamento a reforzar o compromiso colectivo coa ciencia e coa investigación oncolóxica para que os progresos acadados nos laboratorios poidan traducirse nunha atención máis rápida e eficaz ás persoas enfermas.