A unidade móbil do DNI e pasaporte regresará a Miño en xullo
A unidade móbil da Policía Nacional para a expedición e renovación do DNI e do pasaporte volverá desprazarse a Miño os días 14 e 15 de xullo. O servizo instalarase nos soportais de Rabazal, ao lado das dependencias da Policía Local, para facilitar estes trámites á veciñanza sen necesidade de desprazarse a outras localidades.
O prazo para solicitar cita previa abrirase o luns 15 de xuño. As persoas interesadas poderán facelo presencialmente no Concello ou chamando ao teléfono 981 78 20 06. A reserva será necesaria para poder ser atendido pola unidade móbil.
Este dispositivo xa visitou Miño noutras ocasións dentro do servizo itinerante impulsado pola Policía Nacional, que permite achegar a expedición e renovación da documentación oficial a distintos municipios. En maio deste ano, a unidade móbil tamén estivo na localidade para realizar estes trámites.
O Concello recomenda á veciñanza que solicite a cita con antelación e que consulte previamente a documentación necesaria para cada trámite, especialmente nos casos de primeira expedición, renovación por caducidade, perda ou cambio de datos.