A Travesía do Xalo celebra os seus 15 anos cunha fin de semana de deporte, música e festa no monte
A Travesía do Xalo xa ten pechada a programación completa para a súa edición máis especial. A cita, que este ano conmemora 15 anos no monte, converterá Castelo, en Culleredo, nun punto de encontro para persoas afeccionadas ao deporte na natureza e tamén para o público que queira sumarse ao ambiente festivo ao longo de toda a fin de semana.
O programa arrancará o venres 24 de abril coa apertura da taberna e a entrega de dorsais desde as 16.00 horas, un primeiro movemento pensado para facilitar a recollida de material e quentar motores antes da xornada central do sábado. Será entón cando se concentre o groso das actividades, cunha mañá marcada pola entrega de dorsais desde as 9.00 horas e pola saída das carreiras e da andaina a partir das 10.00.
A programación do sábado estenderase durante toda a xornada. Ás 14.00 horas celebraranse as carreiras infantís e, xa pola tarde, a organización entregará os premios e recoñecementos ás 15.30 horas. Desde as 16.30, a Travesía do Xalo dará paso á chamada 'Festa do Monte', na que haberá concertos de Mekanica Rolling Band, Los Alcántara e Juego Sucio. O cartel inclúe tamén unha churrascada para completar unha proposta que busca ir máis alá do estritamente deportivo.
A celebración botará o peche o domingo 26 de abril cunha sesión vermú na taberna desde as 14.00 horas, amenizada por Misuria. Deste xeito, a organización reforza o carácter de fin de semana completa dunha proba xa asentada no calendario e que neste aniversario quere combinar o espírito da montaña coa convivencia e a música en directo.