A “Tarriomería” do CEIP de Tarrío celebra a súa 18ª edición como referencia festiva e educativa en Culleredo
O CEIP Plurilingüe de Tarrío acolleu a décimo oitava edición da “Tarriomería”, unha xornada lúdica e de convivencia que se ten consolidado como unha das citas máis destacadas do calendario escolar de Culleredo. O evento, pensado para despedir o curso nun ambiente festivo, tivo como principais protagonistas ao alumnado máis novo.
A directora do centro, Almudena Veira, agradeceu o apoio do Concello de Culleredo e puxo en valor a consolidación desta iniciativa como un referente educativo na comarca, froito da implicación continuada de toda a comunidade escolar.
Pola súa parte, o alcalde de Culleredo, José Ramón Rioboo, acompañado por membros do goberno local, destacou a importancia desta celebración e agradeceu o traballo constante de docentes, alumnado e da ANPA, cuxo esforzo e participación permitiron situar a “Tarriomería” como unha referencia no ámbito educativo da área metropolitana. O rexedor subliñou tamén que se trata dun “exemplo valioso de creación de comunidade no municipio”.
Rioboo tivo tamén palabras de recoñecemento para o novo equipo directivo do centro pola organización desta edición, así como para a anterior dirección, que puxo en marcha a actividade hai 18 anos e contribuíu ao seu crecemento ata convertela nun evento consolidado. Ademais, lembrou a traxectoria do colexio, o máis antigo do Concello, que celebrou hai dous anos o seu 50 aniversario.
A xornada comezou coa realización de obradoiros infantís e inchables, amenizados pola actuación musical de Álex Rodríguez. Posteriormente, tivo lugar unha comida campestre na que destacaron os callos e o churrasco, que reuniron a centos de asistentes.
Pola tarde desenvolveuse unha masterclass de zumba e, xa como peche, unha verbena final tamén a cargo de Álex Rodríguez. A organización do evento correu, un ano máis, a cargo do CEIP de Tarrío, coa colaboración do Concello de Culleredo e da ANPA do centro.