A Reserva de Biosfera Mariñas Coruñesas busca representante xuvenil para un mandato de catro anos
A mocidade das Mariñas Coruñesas terá a oportunidade de contar cunha voz propia nas redes xuvenís da UNESCO e da Rede Española de Reservas de Biosfera. A Reserva de Biosfera Mariñas Coruñesas e Terras do Mandeo abriu o proceso de selección da súa persoa representante xuvenil, que asumirá esta función durante un mandato de catro anos.
A iniciativa busca reforzar a participación dos mozos e mozas na construción do futuro do territorio, facilitando que poidan trasladar as súas propostas e contribuír ás iniciativas vinculadas á sustentabilidade, á conservación do patrimonio natural e cultural e ao desenvolvemento local.
A convocatoria está dirixida a persoas de entre 18 e 35 anos que teñan vinculación con algún dos municipios que forman parte da Reserva de Biosfera. O proceso de selección será aberto e público, e estará baseado nos principios de igualdade, mérito, capacidade e obxectividade, segundo a información publicada pola entidade.
A persoa elixida representará á mocidade do territorio nos espazos de participación xuvenil relacionados co Programa MaB da UNESCO e coa Rede Española de Reservas de Biosfera. O obxectivo é que as novas xeracións poidan achegar ideas, trasladar as súas inquedanzas e participar nos debates sobre os retos ambientais, sociais e económicos que afectan ao territorio.
A Reserva de Biosfera considera a implicación xuvenil unha peza clave para o relevo xeracional e para avanzar cara a un modelo de desenvolvemento sostible. A través desta representación, pretende fortalecer as canles de diálogo e colaboración coa mocidade e facilitar que a súa perspectiva sexa escoitada.
Como presentar a candidatura
As persoas interesadas poden presentar a súa candidatura ata o 2 de novembro de 2026. A documentación deberá enviarse ao correo electrónico info@marinasbetanzos.gal.
As bases reguladoras recollen os requisitos e a documentación necesaria para participar no proceso. Poden consultarse na web oficial da Reserva de Biosfera, no apartado de Xuventude.