A rapazada de Carral poderá gozar dunha xornada no Aquapark de Cerceda
A chegada do verán volve traer a Carral unha das actividades máis agardadas pola rapazada. A Oficina Municipal de Información Xuvenil organiza unha nova excursión ao Aquapark de Cerceda, unha saída que se celebrará o venres 26 de xuño e que é xa unha das propostas máis veteranas da programación xuvenil municipal.
A actividade está dirixida a mozos e mozas nacidos entre 2009 e 2018. A saída realizarase ás 11.15 horas desde o local Interxeracional, situado na rúa Alcalde Juan Seijas, número 8, baixo, e o regreso está previsto para as 19.30 horas.
O prezo será de 8 euros por participante. As prazas cubriranse por orde de inscrición, con preferencia para as persoas empadroadas no municipio. Desde a organización lembran que non se debe realizar o pagamento ata recibir a confirmación da praza.
O prazo para anotarse abrirase o 8 de xuño ás 9.00 horas e permanecerá dispoñible ata o 11 de xuño ás 19.30 horas. Non se admitirán solicitudes antes da apertura oficial do prazo. As inscricións poderán enviarse por WhatsApp ao número 674 793 475, por correo electrónico a omix@carral.es ou de forma presencial no Local Interxeracional, de luns a venres en horario de 16.30 a 19.30 horas.
A rapazada participante deberá levar comida, protección solar, sandalias, traxe de baño e toalla para gozar dunha xornada pensada para despedir o curso entre auga, xogos e convivencia.