A provincia de A Coruña suma novas concentracións pola paz e en apoio ao pobo palestino
A Praza da Constitución de Betanzos será escenario este venres 24 de abril, ás 20.00 horas, dunha concentración convocada polo Concello e pola entidade Parar A Guerra para expresar o rexeitamento á guerra en Oriente Medio e mostrar apoio ao pobo palestino en Gaza.
A mobilización brigantina enmárcase nunha nova vaga de protestas en Galicia. Entre as convocatorias anunciadas para o sábado 25 figura tamén a da cidade da Coruña, na Praza do Obelisco, ademais doutras citas en Ferrol, Santiago, Toques, Rianxo, Ares ou Ribeira.
A convocatoria de Betanzos mantén así o foco nun conflito que segue xerando unha forte preocupación social. Os organismos internacionais continúan alertando de que a situación en Gaza é moi grave, con condicións de vida límite para a poboación civil e coa maioría das familias desprazadas e dependentes da axuda humanitaria.
Con este acto, Betanzos volverá sumarse ás iniciativas de rúa que se están a promover tamén noutros puntos da provincia da Coruña, nunha fin de semana marcada por chamamentos á paz, ao cesamento da violencia e á solidariedade coa poboación palestina.