A Mostra de Cans de Caza de Abegondo reúne a criadores e afeccionados nunha concorrida xornada en As Quintás
A finca de As Quintás acolleu este domingo a XXVII edición da Mostra de Cans de Caza de Abegondo, unha cita consolidada no calendario cinexético galego que reuniu a numerosos criadores, propietarios e afeccionados chegados de distintos puntos de Galicia.
O evento, organizado polo Concello de Abegondo en colaboración coa Asociación de Cazadores local, desenvolveuse ao longo da mañá e concluíu coa entrega de premios ás mellores exemplares e lotes participantes nas distintas categorías.
O recoñecemento ao Mellor Can da mostra foi para "Capitán", un exemplar da raza Gascon Saintongeois propiedade de García, de Antas de Ulla. Pola súa banda, o primeiro premio na categoría de Caza Maior foi para Pepe Leira, de Vilarmaior, co seu sabuxo español "Amelia".
Na modalidade de Caza Menor de Pluma, o primeiro posto foi para "Arai", un pointer propiedade de Rubio, de Sada. En Caza Menor de Pelo, o triunfo correspondeu a "Terri", un beagle presentado por Raúl, de Paderne.
O galardón ao Mellor Lote foi para Josacho, da Laracha, cos exemplares "Papa", "Roma", "Bonita" e "Pequeña", da raza Anglo-Francés. Ademais, o premio á Mellor Camada recaeu nun grupo de Grifón Azul de Gascuña presentado por Pedro, de Abegondo.
O alcalde, José Antonio Santiso Miramontes, o concelleiro Marcos Zapata Díaz e representantes da Asociación de Cazadores participaron na entrega dos trofeos aos gañadores dunha edición que volveu confirmar o atractivo e a relevancia desta cita para o sector cinexético galego.