A intelixencia artificial impulsará a mobilidade, a administración e o turismo en Arteixo
O Concello de Arteixo recibirá 1,8 millóns de euros do Ministerio de Ciencia para poñer en marcha proxectos baseados na intelixencia artificial destinados a mellorar a mobilidade, axilizar os procesos internos da administración municipal e reforzar as posibilidades turísticas e de ocio do municipio.
A achega, procedente de Fondos Feder, suporá o 60% dun investimento global de 3 millóns de euros. Segundo explica o Concello, os fondos serán ingresados por adiantado antes da licitación dos proxectos, que agora comezarán a redactarse. Para cubrir o 40% restante, arredor de 1,2 millóns de euros, o Goberno local traballa con outras administracións co obxectivo de obter o maior financiamento externo posible.
Esta concesión está vinculada á incorporación de Arteixo á Rede Innpulso, un espazo promovido polo Ministerio de Ciencia no que participan 112 concellos de toda España interesados en desenvolver iniciativas innovadoras. Nos últimos meses, o Concello impulsou distintas accións dentro desta rede, entre elas xornadas de compra pública de innovación dirixidas a empresas tecnolóxicas interesadas en participar en proxectos de intelixencia artificial no municipio.
O proxecto central recibirá o nome de 'Arteixía' e ten como finalidade deseñar, desenvolver, probar e despregar unha plataforma municipal de intelixencia artificial. Esta ferramenta funcionará como un ecosistema dixital centralizado para recoller, procesar, analizar e visualizar datos de diferentes fontes, ademais de formular recomendacións útiles para a xestión pública.
Un dos principais ámbitos de aplicación será a mobilidade. A plataforma permitirá integrar información procedente de sensores, bases de datos municipais, sistemas Smart City, redes sociais e outros recursos, para analizala mediante algoritmos avanzados. O obxectivo é dispoñer dunha ferramenta intelixente e predictiva que facilite a toma de decisións en tempo real e a planificación estratéxica do municipio.
As liñas de transporte municipal e autonómico que pasan por Arteixo, o sistema público de bicicletas e o uso das principais vías de comunicación poderán ser avaliados e mellorados a través desta iniciativa. A intención é avanzar cara a unha xestión máis coordinada, eficiente e adaptada ás necesidades da veciñanza, visitantes e tecido empresarial.
Ademais da mobilidade, o Concello prevé desenvolver unha plataforma dixital avanzada para optimizar os servizos municipais, incorporando tecnoloxías vinculadas á intelixencia artificial que permitan mellorar a organización interna e a atención á cidadanía.
O alcalde de Arteixo, Carlos Calvelo, destacou a relevancia desta concesión e sinalou que é importante que o municipio 'siga avanzando en ferramentas innovadoras que contribúan a mellorar os servizos públicos'.