A iniciativa 'Baixo o Mesmo Paraugas' visibilizará a inclusión na explanada do Parrote
A iniciativa “Baixo o Mesmo Paraugas” celebrará a súa novena edición este domingo, 3 de decembro, ás 12.00 horas na explanada do Parrote, coincidindo co Día Mundial da Discapacidade. O acto busca promover a inclusión e visibilizar os dereitos das persoas con discapacidade, reunindo a máis de 100 entidades e organizacións que alzarán os seus paraugas como símbolo de unión e diversidade.
Na presentación do evento, realizada esta mañá, a concelleira de Benestar Social, Participación e Igualdade, Nereida Canosa, estivo acompañada por Ricardo Iglesias, xerente de ASPACE-Coruña. A concelleira destacou a relevancia dunha iniciativa que, desde o seu nacemento en 2016, se converteu nun referente na loita pola igualdade: “’Baixo o Mesmo Paraugas’ reflicte que a inclusión é un dereito irrenunciable e un valor esencial para unha sociedade xusta”.
O programa contará coa lectura dun manifesto realizado por catro persoas con discapacidade e un alumno/a dun colexio, ademais dunha interpretación musical da canción “Unha marea de xente”, que convidará ao público a alzar os seus paraugas. A xornada será conducida polos presentadores Fran Rei e Corina Alfonso e culminará coas actuacións musicais de Poten100mos e Silvia Penide, arredor das 13.00 horas.
A edil tamén resaltou o compromiso do Goberno local coas entidades sociais, destinando máis de 3 millóns de euros a programas e proxectos sociais. “Unámonos nesta marea de diversidade, porque cada paraugas aberto é unha voz máis na defensa da igualdade e da dignidade”, concluíu Canosa.