A iluminación de Nadal de Cambre sairá a licitación por máis de 127.000 euros
A decoración luminosa do Nadal en Cambre contará cun orzamento base de licitación de 127.233,71. O Concello iniciou o procedemento para contratar o alugueiro, a instalación e o mantemento da iluminación ornamental da campaña 2026-2027, cunha proposta que busca ofrecer unha estética homoxénea tanto nos núcleos urbanos como nas parroquias rurais do municipio.
O contrato, publicado na Plataforma de Contratación do Sector Público, ascende a 153.952,79 euros. As empresas interesadas poderán presentar as súas ofertas ata o 6 de novembro, mentres que a adxudicación aínda está pendente.
Máis de 300 elementos luminosos
O proxecto contempla a instalación de 59 arcos luminosos, 182 elementos decorativos para farolas, 44 árbores ornamentais e 16 figuras luminosas en tres dimensións. A estes elementos súmanse 875 metros de fío luminoso para decorar diferentes espazos e fachadas, así como un rótulo de felicitación do Nadal situado no Paraguas do Temple.
A distribución da iluminación dará un peso destacado aos principais núcleos urbanos, como O Temple, Cambre e A Barcala. Non obstante, o contrato tamén prevé a presenza de elementos decorativos en todas as parroquias, co obxectivo de estender a ambientación do Nadal polo conxunto do territorio.
Os pregos establecen que a decoración deberá manter unha estética global, coherente e adaptada ás características dos espazos nos que se instale, tanto en contornas urbanas como rurais.
Instalación antes do 5 de decembro
O calendario previsto establece que toda a iluminación deberá estar instalada antes do 5 de decembro de 2026. O contrato inclúe o alugueiro dos elementos, a montaxe, a legalización das instalacións eléctricas, as probas de funcionamento e o mantemento durante o período de acendido.
O desmontaxe realizarase por fases a partir do 7 de xaneiro de 2027 e deberá estar completamente rematado o 31 de xaneiro dese ano.
En canto aos horarios de funcionamento, a documentación recolle unha proposta orientativa de acendido entre as 18.00 e as 00.00 horas de luns a xoves, e ata as 2.00 horas os venres, sábados, domingos e festivos. Para os días 24 e 31 de decembro, así como para o 5 de xaneiro, prevese prolongar o horario ata as 5.00 horas. Os horarios definitivos quedan pendentes de determinación.