A folga do comercio de alimentación deixa tendas baixo mínimos e mobilizacións na provincia
O persoal do comercio de alimentación da provincia da Coruña protagonizou este venres unha xornada de folga marcada por tendas funcionando con servizos mínimos, seccións pechadas e mobilizacións nas rúas. A protesta foi convocada para reclamar melloras salariais e laborais no convenio colectivo, bloqueado pola falta de avances na negociación.
Segundo a CIG-Servizos, o seguimento superou o 80% entre o persoal de Gadis e Froiz, dúas das principais empresas do sector na provincia. A central asegura que moitos establecementos abriron só co persoal eventual e de responsabilidade, con caixas sen servizo e seccións como carnicería ou peixaría sen actividade.
A folga tamén tivo impacto nos centros loxísticos. No almacén principal de Gadis en Piadela, en Betanzos, a CIG afirma que só entrou a traballar arredor do 10% do persoal, mentres que na plataforma de distribución de peixe o paro foi total. A organización sindical destaca que se trata dunha resposta inédita nun sector que non convocaba unha folga polo seu convenio desde 2009.
As mobilizacións deixáronse notar na Coruña, Ferrol, Santiago, Ribeira e Carballo, con piquetes informativos e manifestacións nas que participaron centos de persoas traballadoras. Entre as consignas repetidas estiveron reclamacións de melloras salariais, redución de xornada e máis medidas de conciliación.
A CIG denuncia tamén presións empresariais nas últimas semanas e asegura que presentou unha denuncia ante a Inspección de Traballo contra Gadis por impedir a dous membros do comité de folga exercer as súas funcións nun almacén. A central advertiu de que non consentirá represalias contra o persoal que participou no paro.
As demandas sindicais céntranse en incrementos salariais que permitan superar soldos que, segundo a CIG, rondan os 1.100 euros mensuais a xornada completa, ademais dunha redución da xornada anual, melloras nos horarios, licenzas, libranzas en sábado e a creación dun complemento de antigüidade.
A seguinte data clave será o 5 de xuño, cando está prevista unha nova reunión coa patronal. A CIG agarda que as empresas acudan con propostas que permitan desbloquear o convenio. De non haber avances substanciais, a central xa advirte dunha nova xornada de folga o 23 de xuño, coincidindo coa noite de San Xoán.