A falta de reunións do Consello Escolar reabre o debate educativo en Culleredo
A situación dos centros educativos de Culleredo volve ao debate municipal. O Consello Escolar Municipal, o órgano chamado a reunir familias, profesorado, alumnado, direccións de centros e administracións para abordar os problemas do ensino no concello, foi renovado a comezos de ano, pero segue no centro da polémica pola súa falta de actividade.
O pleno aprobou por unanimidade en xaneiro a nova composición do Consello Escolar Municipal, coa intención de actualizar a representación da comunidade educativa e reforzar a participación nos asuntos escolares. O propio Concello define este órgano como un espazo de consulta e participación sobre a programación do ensino non universitario e a planificación dos centros no ámbito local.
A pesar desa renovación, o BNG asegura que o Consello Escolar Municipal non se reuniu nin unha soa vez no que vai de mandato. A formación considera que esa ausencia de convocatorias deixa sen un foro estable asuntos que afectan directamente ao día a día das familias e dos centros.
Entre os temas que, segundo os nacionalistas, deberían abordarse nese espazo figuran a redución de persoal de apoio, as listas de agarda nas escolas infantís, as queixas polo mantemento dos colexios e a situación dos comedores escolares. O caso do CEIP de Tarrío aparece de novo como un dos puntos sensibles, especialmente polo impacto que poden ter as condicións de uso do comedor sobre parte do alumnado de Educación Infantil procedente da zona urbana.
A preocupación polos comedores non é allea ao debate educativo en Galicia. A Xunta defende que nos comedores de xestión autonómica as tarifas están organizadas segundo a renda familiar y que continúan conxeladas desde 2013, cunha parte maioritaria do alumnado exenta de pago ou abonando cantidades reducidas. Tamén anunciou unha liña de axudas para familias usuarias de comedores xestionados por Anpas, concellos ou centros concertados.
No caso de Tarrío, a propio centro recolle que o pago do comedor depende da renda cando o alumnado ten dereito ao servizo, mentres que o alumnado de fóra da zona que solicita voluntariamente o centro pode ter que asumir a tarifa máxima se hai praza dispoñible. Este tipo de situacións son as que, segundo a oposición, deberían analizarse nun órgano no que estean representadas todas as partes.
O malestar polo funcionamento do Consello Escolar Municipal non é novo. En 2024, o BNG xa pedira a súa convocatoria pola situación da limpeza nos centros educativos, nun momento no que a empresa encargada do servizo declarara un ERTE para todo o persoal. Daquela, a formación xa reclamaba que o órgano servise para abordar problemas que afectaban á salubridade e ao funcionamento dos colexios.
A planificación educativa en Culleredo tamén leva anos xerando discusión. A CIG-Ensino denunciara no seu día a falta dun mapa escolar actualizado para evitar problemas de saturación e garantir unha organización adecuada da escolarización no municipio, unha cuestión que tamén foi levada a distintos ámbitos de representación educativa.
Neste contexto, o portavoz municipal do BNG, Tono Chouciño, reclama ao Goberno local que convoque o Consello Escolar Municipal e o utilice como ferramenta real de participación. A formación sostén que o órgano permitiría detectar problemas antes de que se agraven e buscar solucións coordinadas entre centros, familias e administracións.