A falta de fibra leva o BNG de Irixoa a pedir unha cobertura dixital para todo o municipio
O BNG de Irixoa levou ao pleno municipal as dificultades que, segundo asegura, segue atopando parte da veciñanza para acceder a unha conexión de internet de calidade. A formación pide ao Goberno local que adopte as medidas necesarias para estender a fibra óptica a todas as parroquias e núcleos de poboación.
O portavoz municipal nacionalista, Sergio Boado, explicou que existen vivendas que xa dispoñen do servizo mentres outras, mesmo situadas en zonas próximas, continúan sen cobertura. Nalgúns casos, segundo trasladou, as persoas afectadas reciben como resposta que deben asumir o custo da instalación de postes para poder conectarse.
Ante esta situación, o BNG solicita información sobre o estado real do convenio asinado polo Concello para facilitar o despregamento da fibra. Tamén reclama que o Goberno municipal detalle as xestións realizadas coas operadoras e con outras administracións para evitar diferenzas entre a veciñanza en función do lugar no que reside.
Boado considera que o Concello debe asumir un papel activo e defender que o acceso ás telecomunicacións se preste en igualdade de condicións. A formación sostén que non debería recaer sobre os particulares o custo de infraestruturas necesarias para completar a cobertura en determinadas zonas do municipio.
Os nacionalistas lembran que internet se converteu nun servizo esencial para realizar trámites, estudar, traballar ou acceder a determinadas prestacións. No medio rural, engaden, unha boa conexión tamén pode favorecer o teletraballo, a creación de empresas e a fixación de poboación.
Por este motivo, o BNG pide que se negocie coas compañías provedoras unha solución para as vivendas que permanecen sen fibra e que se informe á veciñanza dos prazos e das actuacións previstas para completar o despregamento.