A Escola de Participación da Coruña oferta 19 cursos gratuítos con 400 prazas
O Concello da Coruña abrirá mañá, martes 13 de outubro, o prazo de inscrición para unha nova edición da Escola de Participación, que ofrecerá 19 cursos e obradoiros gratuítos durante os meses de outubro e novembro. A programación suma 165 horas formativas e dispón de 400 prazas, dirixidas tanto ao tecido asociativo da cidade como ás persoas interesadas en ampliar os seus coñecementos e capacidades.
A iniciativa, coordinada polo Servizo Municipal de Participación Cidadá, busca proporcionar recursos prácticos para mellorar o funcionamento das asociacións e facilitar o desenvolvemento dos seus proxectos. A concelleira de Benestar Social, Participación e Igualdade, Nereida Canosa, explicou que o obxectivo é dotar as entidades de ferramentas para organizarse, xestionar as súas actividades e acceder ás axudas públicas.
Unha das principais novidades desta edición será a incorporación dun bloque específico sobre subvencións e convenios, impartido por persoal municipal que traballa directamente na súa tramitación. As sesións abordarán aspectos prácticos relacionados coa solicitude, a xestión e a xustificación das axudas, mediante obradoiros adaptados ás necesidades das entidades deportivas, culturais, veciñais, de servizos sociais e de igualdade.
A programación contará tamén coa participación da Fundación Emalcsa, que ofrecerá unha sesión centrada nas súas convocatorias de cultura e deporte inclusivo.
Os contidos da Escola elaboráronse tendo en conta as propostas das asociacións inscritas no Rexistro Municipal de Asociacións da Coruña (REMAC), consultadas polo Concello para axustar a oferta ás súas necesidades. Entre as materias previstas figuran contabilidade e fiscalidade, comunicación e redes sociais, intelixencia artificial, protección de datos, xestión de entidades e elaboración de proxectos e memorias.
A oferta non se limita ás asociacións, senón que inclúe actividades abertas ao conxunto da cidadanía. Así, haberá cursos de lingua de signos, primeiros auxilios, educación emocional, meditación, iniciación á intelixencia artificial, técnicas para falar en público e resolución de conflitos. Ademais, desenvolverase un ciclo de educación emocional para mozos e mozas de entre 16 e 30 anos no Espazo Xuvenil Remanso.
A Casa Veeduría, novo espazo de formación
Boa parte das actividades presenciais terán lugar na Casa Veeduría, na Cidade Vella, recentemente inaugurada como nova sede do Servizo Municipal de Participación Cidadá. O inmoble está concibido tamén como un lugar de encontro e formación para as asociacións coruñesas.
A Escola combinará sesións presenciais con propostas en liña e semipresenciais. As persoas interesadas poderán formalizar a inscrición a partir do 13 de outubro a través do formulario dispoñible na web municipal, www.coruna.gal/participacion.
O prazo permanecerá aberto ata cubrir todas as prazas. A adxudicación realizarase por rigorosa orde de inscrición e habilitaranse listas de agarda nas actividades que esgoten a súa capacidade.
Para obter máis información, pódese contactar co Servizo Municipal de Participación Cidadá a través do correo electrónico participacion@coruna.gal ou do teléfono municipal 010.