A Domus reunirá tecnoloxía, robótica e divulgación na feira OSHWDem 2026
A Domus da Coruña converterase o vindeiro sábado, 3 de outubro, nun punto de encontro para a tecnoloxía aberta coa celebración da Feira de Tecnoloxías Abertas OSHWDem 2026. O evento, de acceso gratuíto e coa colaboración do Concello, contará con actividades divulgativas, demostracións, charlas e talleres dirixidos a diferentes niveis de experiencia.
A programación combinará distintas disciplinas relacionadas coa tecnoloxía, entre elas a electrónica, a robótica e a radioafección. Tamén se desenvolverán propostas prácticas e competicións nas que os participantes poderán poñer a proba os seus coñecementos e creacións.
O concelleiro de Cultura e Turismo, Gonzalo Castro, destacou o papel deste tipo de iniciativas na divulgación científica e salientou que a Domus constitúe un espazo de referencia neste ámbito. Segundo sinalou, a feira permitirá achegar a tecnoloxía a persoas de todas as idades e con diferentes graos de experiencia.
A robótica terá un protagonismo especial durante a xornada, con diferentes concursos que requiren inscrición previa. As competicións incluirán categorías como Labirinto, Siguelíneas Iniciación, Velocistas, Combate e Minisumo Hebocon.
As persoas interesadas poderán participar tanto de maneira individual como formando parte dun equipo, nunha programación que pretende combinar o carácter divulgativo da feira coa participación directa dos asistentes.