A Coruña reactiva o debate sobre a área metropolitana con novos pasos cara á cooperación entre concellos
O Concello da Coruña deu un novo impulso ao proxecto da futura área metropolitana coa celebración da Comisión Informativa Especial creada para abordar este ámbito, un órgano que non se reunía desde a súa constitución en xullo de 2023. A sesión serviu para iniciar un calendario de traballo que se desenvolverá entre setembro deste ano e marzo de 2027 co obxectivo de definir unha estratexia común cos municipios da contorna.
O concelleiro de Economía e Planificación Estratéxica e portavoz do Goberno municipal, José Manuel Lage, defendeu que o futuro da área metropolitana debe asentarse na cooperación voluntaria entre concellos e na prestación compartida de servizos, sen crear unha nova administración política. Segundo explicou, a prioridade pasa por coordinar políticas que xa funcionan como unha realidade compartida, desde a mobilidade ata a vivenda, o emprego, os equipamentos públicos ou a planificación territorial.
Entre as principais propostas figura a creación dun Consorcio Metropolitano de Transportes, un organismo participado polos municipios que permitiría coordinar o transporte urbano e interurbano, planificar conxuntamente as liñas e avanzar cara a unha integración tarifaria.
O Goberno local tamén propón impulsar infraestruturas compartidas para toda a área da Coruña, como unha rede metropolitana de aparcadoiros disuasorios, corredores verdes, itinerarios ciclistas entre concellos, unha plataforma dixital única para a mobilidade e unha maior coordinación das redes de abastecemento, saneamento e infraestruturas hidráulicas.
Segundo Lage, unha planificación conxunta permitiría tamén acceder con máis facilidade a financiamento europeo e reforzar a competitividade da área da Coruña, que concentra arredor de 450.000 habitantes, para atraer investimento, empresas e talento.
O BNG reivindica a súa iniciativa
Tras a reunión, o BNG destacou que a comisión volveu convocarse en cumprimento da moción presentada pola formación nacionalista e aprobada no pleno do pasado mes de xuño.
O viceportavoz municipal do BNG, Francisco Jorquera, mostrou a súa satisfacción pola reactivación do órgano e asegurou que responde á insistencia mantida polo seu grupo durante os últimos anos. Segundo explicou, durante a sesión o Goberno local entregou os estudos dos que dispón o Concello sobre a área metropolitana, algúns dos cales, ao seu xuízo, precisan ser actualizados.
Os nacionalistas propuxeron ademais que nas próximas reunións comparezan representantes de institucións, persoas expertas, entidades sociais e organizacións económicas para achegar diferentes visións sobre a realidade metropolitana.
Para Jorquera, cuestións como o transporte, a mobilidade, a planificación urbanística, a ordenación do territorio ou a xestión dos residuos deben abordarse desde unha perspectiva supramunicipal. O representante do BNG considera que a constitución da área metropolitana debe ser o resultado final dun proceso que agora comeza e que cualificou de longo e complexo, pero necesario para afrontar os retos da Coruña do século XXI.