A Coruña ofrece ás empresas un curso gratuíto para aprender a contratar coa Administración
As pequenas e medianas empresas e as persoas autónomas da Coruña terán unha nova oportunidade para coñecer mellor as posibilidades que ofrece a contratación pública. O Concello organizará o próximo 16 de setembro un curso gratuíto e presencial no Centro Municipal de Empresas Accede Papagaio centrado na preparación e presentación de ofertas para participar en licitacións públicas.
A formación comezará ás 17.00 horas e será necesario realizar inscrición previa para participar.
O obxectivo da iniciativa é achegar ás empresas locais a contratación pública como unha posible vía de negocio e facilitarlles ferramentas prácticas para elaborar propostas competitivas e cumprir correctamente cos requisitos das diferentes licitacións.
Ao longo do curso abordaranse cuestións fundamentais para afrontar este tipo de procesos, desde a procura dunha licitación ata o envío electrónico da oferta. Entre os contidos previstos figuran a localización e identificación de oportunidades, a interpretación dos anuncios e pregos, a comprobación dos requisitos previos e a preparación da documentación administrativa.
A formación tamén explicará como elaborar tanto a proposta técnica como a oferta económica, ademais de como organizar toda a documentación necesaria para a súa presentación. As persoas participantes coñecerán igualmente, paso a paso, o procedemento para realizar o envío electrónico da oferta.
A sesión rematará cunha revisión dos aspectos que deben comprobarse antes de pechar unha proposta e coa análise dos erros máis habituais que poden producirse durante a presentación das ofertas.
O concelleiro Juan Ignacio Borrego destacou a importancia dos centros municipais de empresas como espazos de apoio á actividade económica e á formación. Segundo sinalou, iniciativas deste tipo buscan ampliar os recursos ao alcance das empresas locais, especialmente das pequenas e medianas, para favorecer o seu crecemento e consolidación no tecido produtivo da cidade.
Para poder participar no curso será necesario dispoñer dun ordenador portátil con JavaScript instalado e operativo, así como ter sinatura dixital habilitada.