A Coruña impulsa un modelo pioneiro para deseñar de forma colaborativa o peche urbano de Loureiro
A cidade da Coruña vén de activar un proxecto de innovación urbanística co que se pretende definir de maneira conxunta o peche noroeste do seu tecido urbano, no ámbito de Loureiro. Trátase dun dos principais desafíos pendentes no desenvolvemento do planeamento urbano da urbe herculina e no que participa activamente o Concello xunto con diferentes axentes técnicos e sociais.
Esta iniciativa configúrase como un espazo de traballo colaborativo no que conflúen perfís institucionais, profesionais e cidadáns, co obxectivo de construír unha visión compartida sobre o futuro deste ámbito estratéxico. Segundo explicou o concelleiro de Urbanismo, Rehabilitación e Vivenda, Francisco Díaz Gallego, o proxecto supón a primeira aplicación en España dunha metodoloxía de planificación urbana de referencia internacional, xa utilizada en cidades como Viena e recoñecida con galardóns como o Holcim Bronze Award Europe ou o Premio Nueva Bauhaus do CSCAE.
Este enfoque, impulsado polo estudo de arquitectura e urbanismo Arenas Basabe Palacios e avalado polo Ministerio de Vivienda y Agenda Urbana, aposta por procesos de planificación máis abertos, participativos e integradores, nos que a cidadanía forma parte activa do deseño da cidade.
O obxectivo principal é establecer as bases do futuro desenvolvemento do bordo urbano entre Os Rosales e San Pedro de Visma, incorporando criterios técnicos, sociais e estratéxicos. Díaz Gallego destacou que se trata de “un proceso no que a veciñanza pode implicarse directamente na planificación urbana, achegando ideas e propostas para o futuro da súa contorna”.
O proxecto baséase na realización de mesas de traballo e talleres participativos nos que colaboran administracións públicas, expertos en urbanismo, paisaxe, sustentabilidade e enerxía, así como representantes académicos, promotores e colectivos sociais. Segundo o edil, esta fórmula permite garantir tanto a calidade técnica das propostas como a súa lexitimidade social.
Nos últimos meses, o equipo técnico vén analizando cuestións relacionadas coa vivenda, a mobilidade, o deseño paisaxístico e a sustentabilidade enerxética, que posteriormente serán contrastadas coa veciñanza dos barrios próximos.
Está previsto que nas próximas fases se abra un proceso de información e consulta con asociacións veciñais e outros colectivos, co fin de adaptar o proxecto ás necesidades reais da cidadanía e incorporar as súas achegas ao deseño final.
Outro dos obxectivos da iniciativa é mellorar a conectividade entre barrios actualmente fragmentados e estruturar un novo modelo urbano arredor do regato de Loureiro. Ademais, o plan contempla a creación dun corredor ecolóxico que conecte espazos naturais como o Monte de San Pedro e o parque de Bens, reforzando a continuidade ambiental e a relación da cidade coa súa paisaxe atlántica.
Díaz Gallego subliñou que A Coruña ten ante si unha oportunidade para situarse á vangarda da planificación urbana contemporánea, apostando por un modelo no que o deseño da cidade se constrúe de maneira aberta, colaborativa e integrada entre técnicos, institucións e cidadanía.