A Coruña impulsa a transformación da contorna da intermodal coa reurbanización da avenida do Ferrocarril
O Concello da Coruña deu un novo paso na transformación urbanística da contorna da futura estación intermodal coa adxudicación das obras de reurbanización da avenida do Ferrocarril, no treito comprendido entre a rolda de Outeiro e a rúa Xeneral Rubín.
A actuación contará cun investimento de 1,4 millóns de euros, cofinanciados con fondos FEDER 2021-2027, e será executada pola empresa Canarga, cuxa oferta foi a mellor valorada pola Mesa de Contratación ao reducir en dous meses o prazo previsto para a execución das obras e ampliar en doce meses o período de garantía.
Os traballos forman parte do Plan de Acción Integrado para conectar a Rolda dos Barrios, incluído na Estratexia de Desenvolvemento Integrado Local da cidade. Segundo as previsións municipais, as obras terán unha duración de oito meses desde o seu inicio.
A intervención permitirá continuar coa remodelación das rúas que rodean a futura intermodal, un proceso que xa avanzou coa renovación da avenida da Sardiñeira e coa creación do novo vial de conexión coa avenida de Arteixo a través da Agra dos Mallos.
A alcaldesa, Inés Rey, destacou que a nova estación intermodal debe servir como motor para transformar os barrios da contorna. Neste sentido, subliñou que o obxectivo é mellorar os espazos públicos da Sardiñeira, Os Mallos e Lonzas, facendo da avenida do Ferrocarril unha vía máis accesible, segura e con maior calidade urbana.