A Coruña establece un operativo especial ante a previsión dunha asistencia masiva para a eclipse total de sol do 12 de agosto
A Subdelegación do Goberno na Coruña acolleu este venres unha xunta extraordinaria de seguridade para coordinar o dispositivo especial previsto con motivo da eclipse total de sol do vindeiro 12 de agosto, un fenómeno astronómico que situará Galicia entre os mellores lugares do mundo para a súa observación e que prevé atraer unha importante afluencia de visitantes.
A reunión estivo presidida polo subdelegado do Goberno na Coruña, Julio Abalde, e contou coa participación de representantes da Subdelegación do Goberno, Protección Civil, Policía Nacional, Garda Civil, Garda Civil de Tráfico, Policía Nacional Adscrita e Concello da Coruña, co obxectivo de planificar de forma coordinada o operativo de seguridade, mobilidade e atención ás emerxencias.
Durante o encontro, Abalde destacou a importancia da coordinación entre as distintas administracións para facer fronte a un evento que reunirá a un elevado número de persoas. Segundo sinalou, “é fundamental ofrecer unha resposta eficaz en materia de seguridade, mobilidade e atención ás emerxencias” para que a cidadanía poida desfrutar deste acontecemento “con todas as garantías”.
A Coruña atópase dentro da franxa de totalidade da eclipse, polo que se espera unha das maiores concentracións de persoas da provincia durante a tarde do 12 de agosto.
Entre os principais espazos propostos polo Concello para seguir o fenómeno figura a contorna da Casa dos Peixes, na avenida de Bos Aires, cunha capacidade estimada para 100.000 persoas, á que se suma a zona do ascensor do Portiño, preparada para acoller outras 100.000. O Monte de San Pedro poderá recibir unhas 40.000 persoas, aínda que ese día permanecerá pechado ao tráfico rodado, mentres que a zona de San Antón, o Náutico e O Parrote contará cunha capacidade aproximada para outras 30.000 persoas. Ademais, tamén se habilitarán diferentes puntos de observación distribuídos polos barrios da cidade.
Como medida de protección, acordouse establecer como zonas de exclusión a contorna da Torre de Hércules, debido ao seu valor natural e patrimonial, e as Illas de San Pedro, co obxectivo de preservar ambos espazos e garantir a seguridade durante a xornada.
A planificación terá en conta tamén a coincidencia da eclipse coa celebración do Trofeo Teresa Herrera, que ese mesmo día reunirá unha importante asistencia de público. Por este motivo, reforzarase o dispositivo de seguridade e poñerase en marcha un plan especial de tráfico.
O Concello instalará un Posto de Mando Avanzado na Coraza, no paseo marítimo, similar ao empregado durante a celebración de San Xoán, mentres que a Policía Nacional despregará un operativo especial de características semellantes ao que activa durante esa festividade.
Durante a reunión analizáronse tamén os retos derivados da elevada concentración de persoas, especialmente no ámbito da mobilidade, a regulación do tráfico, a seguridade cidadá e a coordinación dos servizos de emerxencias e protección civil. Neste sentido, a Garda Civil de Tráfico incrementará os seus efectivos nas estradas da provincia, distribuíndoos de forma dinámica segundo evolucione a circulación ao longo da xornada.
A eclipse do 12 de agosto será a primeira do denominado “Trío de Eclipses 2026-2027-2028”, unha sucesión de tres eclipses visibles desde España que converterán o país nun referente internacional para a observación astronómica durante tres anos consecutivos.
Segundo os datos do Instituto Xeográfico Nacional, 59 dos 93 concellos da provincia da Coruña poderán contemplar a eclipse na súa totalidade, mentres que nos 34 restantes será parcial. No conxunto de Galicia, arredor do 56 % do territorio quedará dentro da franxa de totalidade.
O fenómeno comezará aproximadamente ás 19:31 horas, alcanzará a totalidade arredor das 20:28 horas e rematará ás 21:22 horas, cunha duración próxima á hora e 51 minutos. Ao producirse durante o solpor, ofrecerá condicións especialmente favorables para a observación e a fotografía. Ademais, poucas horas despois producirase o máximo de actividade das Perseidas.
As autoridades insistiron na necesidade de seguir as recomendacións de seguridade para evitar lesións oculares. Recordan que nunca debe observarse o Sol directamente sen protección homologada e que é imprescindible utilizar lentes específicas que cumpran a norma ISO 12312-2:2015, conten con marcado CE auténtico e indiquen claramente o fabricante e as instrucións de uso. Mesmo empregando este tipo de lentes, recoméndase que cada observación non supere un minuto nin acumule máis de tres minutos de exposición.
As administracións tamén solicitaron á cidadanía que planifique con antelación os seus desprazamentos, ante a previsión dunha elevada intensidade de tráfico antes e despois da eclipse, especialmente nos accesos á cidade, ás zonas costeiras e aos miradoiros con maior capacidade. Neste contexto, recomendan evitar desprazamentos innecesarios, seguir as indicacións das forzas de seguridade e extremar a prudencia ao volante. Ademais, lembran que a coincidencia co período de maior risco de incendios forestais obriga a respectar as restricións de acceso aos espazos naturais e a adoptar todas as medidas de prevención.