A Coruña adxudica unha nova actuación na Agra do Orzán para mellorar a accesibilidade e renovar o espazo urbano
O Concello da Coruña deu un novo paso na execución da primeira fase do Plan de Barrios 2025-2027 coa adxudicación das obras de mellora previstas na rúa Agra do Orzán. A intervención permitirá actuar sobre a contorna da intersección da rolda de Nelle coas rúas Meira, Bellavista e Ramón María Aller, co obxectivo de incrementar a accesibilidade e avanzar na humanización deste ámbito urbano.
Segundo informou a alcaldesa, Inés Rey, os traballos foron adxudicados á empresa Success Infraestructuras y Servicios por un importe superior aos 200.000 euros. A actuación forma parte da estratexia municipal para modernizar as rúas deste barrio e mellorar a súa calidade urbana.
A rexedora destacou as características urbanísticas da Agra do Orzán e defendeu a necesidade de acometer actuacións progresivas que permitan transformar o barrio. “Pola súa densidade e o compacto das súas rúas, a configuración urbanística da Agra do Orzán é moi especial. Por iso é fundamental ir traballando de forma progresiva como o vimos facendo desde hai anos, para ir transformando o barrio paso a paso, con medidas que teñan un impacto positivo e real no día a día da veciñanza”, afirmou.
No actual mandato xa se levaron a cabo intervencións no itinerario comprendido entre O Peruleiro e a rúa Barcelona, actuando en vías como Almirante Mourelle, Manuel Deschamps e Julia Minguillón. Estas obras executáronse con financiamento procedente dos fondos europeos Next Generation e permitiron renovar e ampliar as beirarrúas para mellorar a accesibilidade.
O Concello sinala que esta mesma liña de actuación continuará tamén na rúa Páramo, onde as obras xa foron adxudicadas recentemente.
A nova intervención centrarase agora na rúa Agra do Orzán, unha das principais vías do barrio desde o punto de vista da mobilidade. Neste sentido, Inés Rey subliñou que “mellorar as rúas, osixenalas e facelas máis habitables para as persoas tamén contribúe a incentivar o seu tránsito, co positivo que iso é para o pequeno comercio, que cómpre revitalizar porque é sinónimo de vida e dinamización económica”.
Ademais desta actuación, o Concello ultima a posta en marcha doutra intervención no Camiño do Pinar. Tras o asfaltado realizado hai unhas semanas para responder ás peticións da veciñanza, nos próximos días executaranse os traballos de sinalización horizontal e vertical que converterán este percorrido nunha vía de prioridade peonil.
Segundo explica o Goberno local, a circulación de vehículos continuará permitida, aínda que as persoas peóns pasarán a ter preferencia nun itinerario que comunica a rúa Manuel Deschamps co Peruleiro e que discorre entre numerosas vivendas unifamiliares. A medida, acordada tras reunións entre os servizos municipais e os residentes da zona, pretende reforzar a seguridade viaria neste punto do barrio.